EH Bildu critica duramente l’alcuerdu
L’alcuerdu del PP col PNV por que sofite los Presupuestos Xenerales del Estáu non solamente inclúi una importante rebaxa del Cupu de la Comunidá Autónoma Vasca (CAV) y la devolución de 1.400 millones d’euros sinón tamién cerca de 4.000 millones d’euros. La mayor partida ye una inversión de 3.380 millones d’euros hasta 2023 pa una infraestructura ferroviaria que conectara les trés capitales de la CAV n’alta velocidá.
Tres presentar el pactu presupuestariu, Andoni Ortuzar, presidente del PNV reconoció que los asuntos d’autogobiernu, paz y convivencia, y política penitenciaria, nun tuvieron na mesa de negociaciones. “Siempres tan na axenda del PNV, pero nun tuvieron nesta negociación”.
Dende anguaño y pal viniente llustru, el Cupu queda fixau en 956 millones d’euros, 569 menos que’l de 2016, anque nel presupuestu de 2017, inda n’alderique, la cifra provisional yera de 1.200 millones.
En declaraciones a los medios Beitialarrangoitia, vocera d’EH Bildu nel Congresu de los Diputaos de Madrid, afirmó que l’alcuerdu «vien a encontiar y fortalecer al partíu más corruptu d’Europa, que va siguir coles sos polítiques corruptes, antidemocrátiques y antisociales, que vien implementando hasta agora».
This work is licensed under a Creative Commons Attribution 4.0 International License.
