Los camioneros resalten la discriminación qu’implica l’acumuladura d’ayudes al pagu de peaxes en Galicia frente a la situación nel Güerna y achaquenlo al poco pesu políticu d’Asturies nel Estáu

Les autopistes gallegues siguen sumando bonificaciones sobro los sos peaxes, beneficiando a el conductores que circulen pola AP-9 que xune Tui y Ferrol al traviés de 219,6 km, la mayor rebaxa de tarifes na hestoria de l’autopista gallega, lo que va tener un costu pal gobiernu estatal d’alredor de 2300 millones d’euros.

Mentanto, los asturianos vamos siguir zarraos pol Güerna, que nun va cuntar con nenguna rebaxa a pesar de ser la principal salida escontra España pa los tresportistes y unu de les torgues que disuaden a les empreses de producir n’Asturies. Ello ye que el Güerna sigue siendo unu de los peaxes más costosos de la península, con xubíes añales de preciu.

Pa los tresportistes, principales afeutaos, esto supon una clara discriminación qu’achaquen a un “escasu pesu d’Asturies” en Madrid, que se contrapón a la influencia del gobiernu gallegu. La esplicación a esta discriminación, aporfien, nun tien “nin argumentos nin xustificación económica”, polo que tien de ser política, y nello tien enforma que ver la presencia de partíos gallegos nel gobiernu, entantu qu’a Asturies representenla simples sucursales de los mesmos partíos que gobiernen en Madrid, polo que nun faen presión. Recuerden que’l Gobiernu inclusive esanició por completu peaxe de munches otres zones del Estáu.

Ente los descuentos aplicaos en tierres gallegues destaquen el trayeutu de vuelta de baldre pa los vehículos llixeros que lu faigan nun plazu máximu de 24 hores; un 20% pa los que faigan más de 10 viaxes de día y revolvía al mes; un 50% pal percorríu de día nel tramu Puxeiros-Tui, pa quien faigan en 24 hores dos percorríos iguales; ye de baldre el tramu Vigo- Redondela, siempres que los trayectos de día y revolvía seyan a lo más nun día; y un 20% pa los vehículos pesaos, en cualquier percorríu y tolos díes.

Inciden na idea de que n’ Asturies el Güerna ye la principal salida, yá que meter los camiones per Payares ye menos seguro, como demostró’l recién accidente mortal d’un camioneru qu’utilizaba esa vía pa evitar los peaxes.