La Coordinadora Ecoloxista d’Asturies solicitó el desaniciu de la esplotación hidrolléutrica nel ríu Cauxa afluente del ríu Narcea, allugada nel conceyu de Balmonte
La concesión, aprebada con fecha de 30 d’ochobre de 1990 per parte de la Confederación Hidrográfica del Norte, corta dafechu’l calce por aciu una presa de formigón de bultable impautu ambiental que tan solo dexa un pasu mínimu pa la esviadura d’agua per un llateral, con un desaguadoriu d’escasu diámetru que de denguna manera respeta’l caudal ecolóxicu del calce, resultando una torga pal movimientu migratoriu de les especies piscícoles presentes nesti afluente del ríu Narcea.
Una vegada termináu’l plazu concesional de 25 años el pasáu febreru del 2021 la Coordinadora Ecoloxista denuncia que la istalación sigue en furrulamientu, derivando siquier 3.500 llitros/segundu, polo que solicitaron ensin demoranza la paralización darréu del furrulamientu de la citada central, que ta en marcha ensin concesión a valir, reclamando al ex concesionariu que dexe escurrir la mayor cantidá d’agua téunicamente posible en tantu se resuelva la baltadera de diches obres.
Consideren inescusable’l baltu de les obres que pudieren tar feches nel ríu y calce a costa del titular concesional, de manera que s’evite que nun futuru puedan volver otorgase concesiones y autorizaciones ellí, garantizando’l caltenimientu del mediu natural fluvial.
Redaición InfoAsturies
This work is licensed under a Creative Commons Attribution 4.0 International License.
