La plantiya de los dos equipos de fúbol posaron anantes del partíu con una pancarta  pidiendo la vuelta al país de la mocedá emigrao “Queremos que la nuesa xente na diáspora sepa que nun nos escaecemos d’ellos y d’elles y que los sentimos mui cerca. Al mesmu tiempu, reclamamos un futuru na nuesa tierra pa poder vivir con dignidá”

“Mocedá emigrao: sentímosvos cerca. Queremos futuru n’Asturies”, esi yera’l testu de la pancarta que los xugadores del Rosal F.C y Stiaua d’Asturies sacaron al campu  enantes del partíu que los enfrentó.

Con ello queríen rindir homenaxe a les collacies y collacios, familiares y compañeros qu’emigren a la gueta d’una vida meyor en sitios como Madrid, Barcelona o Londres y al mesmu tiempu reivindicar el drechu a seguir viviendo n’Asturies, a nun tener que vese forciaos, ellos tamién, a ser unos más pente los cuasi 15.000 asturianos qu’añalmente colen del país.

Un 45% de paru pente la mocedá emburria a la xente mozo a buscar trabayu onde seya, y los xugaores de los equipos de fútbol nun son escepción: son munchos los compañeros que marchen de clubs como los estos a mitá de temporada porque-yos lleguen oportunidaes llaborales dende fuera del país; oportunidaes y futuru que nun tienen equí, n’Asturies.

Los dos equipos destaquen pol so compromisu con Asturies, qu’amuesen non solo resistiendo nel país, sino comprometiéndose cola nuesa cultura, usando la nuesa llingua ya involucrándose en cuestiones sociales comu esta. Sicasí, les dificultaes económiques nun son ayenes a los clús asturianos, onde en munchos casos l’enfotu ye mayor que les posibilidaes financieres y los patrocinios escaseen, daqué que tendría que llevar a munchos a cuestionase llealtades foriates.

Llucía Fernández Marqués

This work is licensed under a Creative Commons Attribution 4.0 International License.