El programa, que tien comu protagonistes a los meyores toros y vaques del país, ufre un curiosu contrapuntu a la reciente feria taurina cellebrada en Xixón
La TPA estrena en prime time un programa de cuatro emisiones que va costituyir el primer “Cow talent” de la televisión asturiana. Nelli escoyerán, nuna mezcla de concursu de talentos y feria de ganao, los meyores exemplares de vaca y toru de los valles y del monte d’Asturies.
Dexando a un llau el cosmopaletismu anglofalante presente’n tola cuestión, pente reportaxes, desfiles, casting y otres comedies los programes van permitir dar a conocer les ganaderíes, los preparativos y curiaos que preceden a un concursu de ganao y al traviés de les hestories de los participantes, van dexar ver comu viven y comu se trata a los animales.
Pero sobre tou, van contrastar col otru eventu nel que los toros son protagonistes agora mesmo: les sos matances en feries taurines, dexando nidio onde ta la desemeyanza pente Asturies y la brutalidá de la tradición española. Mentantu pa ellos los toros son seres a los que torturar, equí -arguyosos d’ellos- facémosyos concursos de belleza.
Llucía F. Marqués
This work is licensed under a Creative Commons Attribution 4.0 International License.
