La denuncia, presentada énte la Fiscalía Superior d’Asturies afeuta direutamente al empresariu la plaza, al ganaeru y a dos toreros, pero señalen tamién la responsabilidá política de l’alcaldesa Xixón 

Andecha Astur vien de presentar énte la Fiscalía Superior d’Asturies una denuncia por presuntu delitu d’odiu escontra cuatru responsables de la matanza toros que se fexo en Xixón el 15 d’agostu, onde se dio muerte a dos toros col nome de “Nigeriano” y a otru nomáu “Feminista”.

Les cuatru presones acusaes de supuestu delitu d’odiu son Carlos Zúñiga fíu, xerente y alministraor de la empresa Circuitos Taurinos, S.L., que tenía fasta va pocu concedía la xestión de la plaza toros xixonesa, puestu que perdió precisamente por estos fechos, Daniel Ruiz Yagüe, propietariu de la ganadería del mesmu nome, qu’aportó los seyes toros pa la corría’l 15 d’agostu, Antonio Morante Camacho, Morante de la Puebla, mataor de toros que s’encargó de dar muerte al toru “Nigeriano” y al toru “Feminista” y Julián López Escobar, El Juli, mataor de toros que s’encargó de dar muerte a otru toru de nome “Nigeriano”.

Pente los asistentes al violentu espeutáculu alcontrábense Rocío Monasterio, presidenta de Vox Madrid, ya Iván Espinosa de los Monteros, portavoz de Vox nel Congresu español, daqué que xunío a la evidente cercanía de dellos toreros a posiciones d’ultradrecha españolista, dexa nidio la intencionalidá de los nomes de los toros mataos.

El matiz nidiamente machista y racista d’estos nomes xúniéronse a la crueldá ya implícita nel actu mesmu de la tauromaquia, xenerando la refuga de la sociedá asturiana, aumentando la presión social contra esta tradición española, cola consecuencia direuta la suspensión de la concesión a la empresa taurina. Sicasí, dende Andecha Astur consideren qu’eso nun ye abondo, ya que “los vergoñosos fechos asocedíos na matanza toros del 15 d’agostu representen un claru delitu d’incitación al odiu, a la hostilidá, a la discriminación y a la violencia por motivos racistes, pola pertenencia a una etnia, raza o nación, por razones ideolóxiques y de xéneru”. El delitu d’odiu ta reguláu nel artículu 510 del Códigu Penal y conlleva penes d’ente 6 meses y 4 años de cárcele, amás de multes.

Asina mesmo, la organización nacionaliega siñala tamién na so denuncia la responsabilidá política que nestos fechos tien Ana González comu alcaldesa de Xixón, quien permitió toos estos años les matances de toros na plaza xixonesa consintiendo que nella tuviere llugar esti llamáu públicu al odiu por motivaciones racistes y de discriminación ideolóxica “L’alcaldesa, comu responsable de la plaza, tien la responsabilidá de supervisar lo que se fae ellí y la obligación de torgar que s’escenifiquen públicamente prevocaciones facistes comu la que denunciamos”.

Nuria Prendes

This work is licensed under a Creative Commons Attribution 4.0 International License.