Nun país ensin malpenes mocedá, una tasa de paru del 38’6 pente los menores de 25 años implica que malpenes haiga trabayaores menores d’esa edá, una cifra que ronda escasamente les 11.700 persones
Les tases de desemplegu en mocedá d’Asturies son les piores del Estáu y de la Xunión Europea, cuestión que continúa forciando a la mocedá asturiana a emigrar a la gueta d’un futuru llaboral.
N’Asturies viven 68.000 menores n’edá de trabayar, pero namás 19.100 d’ente ellos cuenten a la hora de facer les estadístiques, ya que la mayoría nun ven utilidá dala a tar apuntaos nes oficines del SEPEPA, quedando fuera de les cifres oficiales. D’ellos namás 11.700 tienen trabayu, una tasa d’emplegu del 17’2 %. Otros 7.400 tan rexistraos nes oficines d’emplegu ya’l restu, más de 50.400, caltiénense oficialmente al marxe del mercáu llaboral. Tampocu cuenten dientro les estadístiques de paru les decenes de miles d’asturianos forciaos a colar del país a la gueta trabayu.
Incluso con estos datos tan sesgaos, la cifra de paru xuvenil sigue siendo la mayor, non solo del Estáu, sinón de la Xunión Europea, siendo Asturies el país con piores datos nesi sen.
Pa completar el panorama, la gran mayoría de la mocedá con trabayu tien emplegos cientraos nel sector servicios/hostelería, ún de los más tocaos pola crisis del covid-19 y que destaca pola so temporalidá, inestabilidá y precariedá.
Llucía F. Marqués
This work is licensed under a Creative Commons Attribution 4.0 International License.
