“Nun s’entiende que naide moviera un deu pa solucionar esta situación crítica y tolo más que se-yos ocurre ye presllar centros de salú, plantes d’hospital, arrexuntar y retayar y derivar a la sanidá privada” denuncien les Asociaciones de Vecinos

Va unos díes anunciábase en prensa que “El Sindicatu Médicu alerta del zarru d’Urxencies de Primaria per falta de plantiya. La Área Sanitaria d’Uviéu tien trés puntos de serviciu continúu ensin furrular ya’l SIMPA alvierte de que setiembre va ser peor”. Ante esta enésima llamada d’atención sobro la llaceriosa situación de la Sanidá Pública Asturiana, la Federación d’Asociaciones de Vecinos de Xixón emitieron un comentariu nel qu’apunten a los dirixentes políticos como únicos responsables “colos sos llamentables espectáculos mediáticos” d’esta situación.
Dexen claro que naide puede cuestionar la implicación y esfuerciu de la sociedá en xeneral y los profesionales sanitarios en particular nesta situación tan crítica que tamos viviendo.
La ciudadanía aceutó ensin gutiar midíes d’amenorgamientu de l’atención primaria, entendiendo les midíes sanitaries tomaes, inclusive cuando estes perxudicaron -por falta d’atención- la so propia salú, entantu que los sanitarios tuvieron qu’encarar el problema ensin istruciones clares, en munches ocasiones ensin les erbíes nin medios necesarios y con personal baxo mínimos, reconocieron les Asociaciones de Vecinos.
Quienes nun supieron tar al altor, denuncien, foron los dirixentes políticos, tantu españoles como asturianos. La situación de déficit de personal sanitariu, recuerden, nun tien que ver col andanciu, yá que yera conocida y denunciada dende va años, ensin que naide tomara les midíes necesaries pa correxila.

Redaición InfoAsturies

This work is licensed under a Creative Commons Attribution 4.0 International License.