La Seguridá Social rexistra una perda de 6.709 afiliaos, menos del 9% de los nuevos contratos son indefinios ya’l 40% son a tiempu parcial. Más del 50% de los paraos nun perciben prestaciones

Asturies lidera la xubida del paru nel estáu, con una perda d’afiliación de 6.709 persones y una destrucción d’emplegu del 1,8%, superior a la d’otros setiembres, siendo’l sector más afectáu’l de los servicios y les muyeres y mocedá los más afeutaos. El paru aumentó en 2.539 persones, un 4,1%.

Esta noticia contrasta cola espublizada estos díes a nivel estatal, yá que n’España l’afiliación creció’l 0,3%, rexistrándose un descensu de les cifres del paru.

Más de la metá de les persones en paru nin siquier tienen cobertoria per desemplegu y de les que lo tienen la mayoría son asistenciales, de 425 € al mes.

Per otra parte, de los 28.638 nuevos contratos  solo’l 8,6% fueron indefiníos y el 40% a tiempu parcial. Polo xeneral les condiciones son tan precaries que s’acuña’l términu “Probitú  llaboral”. Trabayar yá nun ye sinónimu de poder cubrir económicamente les necesidaes básiques, de resultes de la reforma llaboral del 2013 los trabayadores encadenen periodos de paru y emplegu precariu, calteniéndose de continuu na probitú. Alredor del 30% de persones probes o en riesgu d’esclusión social ta trabayando.