N’ Asturies nun s’acepten como méritos los cursos de llingua asturiana que, paradóxicamente, sí son aceutaos n’otros territorios del Estáu

Dende SUATEA definen la situación que se vive n’Asturies como d’anormalidá costitucional, por non reconocese la oficialidá del asturianu, situación que paez qu’a la fin va solucionase, “magar se va faer cola oposición de quien, autoproclamándose constitucionalistes, son contrarios a la costitución
nesti puntu, como tamién lo son n’otros. Col agravante de que los mesmos que se nieguen a reconocer la oficialidá del asturianu defenden la del gallegu, el catalán o’l euskera”, Esta situación ta torgando que s’apruebe la especialidá docente d’asturianu, dexando en situación d’eterna precariedá a esti profesoráu, que nun puede nin presentase a oposiciones y torgando que l’alumnáu de dellos centros vea negáu’l so derechu, como asocede nel CP Santiago Apóstol de Mieres.

Amás, magar convocar les pertinentes pruebes de conocencia del asturianu -como la fecha esti fin de selmana por cerca de 500 persones- el profesoráu que tien la certificación oficial en llingua asturiana nun va poder incluyila nesta oposición, porque nun se llexisló nada en tal sentíu.

Per otra parte, SUATEA recordó qu’anguañu hai un númberu bien importante de personal docente en fraude de llei, llevando dellos años encadenando contratos ensin poder estabilizase nel so puestu de trabayu. Nesti sen, los representantes del sindicatu recordaron qu’esisten especialidaes nes que les oposiciones lleven décades ensin convocase, como  les de llatín y griegu, pero esta situación de fraude de llei ye xeneralizada yá que nes especialidaes que sí salen a oposición regularmente l’alministración convoca menos places de les necesaries, lo que llevaba a que persones que, aprobando la oposición, quedar ensin plaza pero, al empar, yeren contrataes para exercer de docentes, “dichu otra manera, sacábense places de menos pa precarizar a una parte del profesoráu”.

Redaición InfoAsturies

This work is licensed under a Creative Commons Attribution 4.0 International License.