Los 700 millones prometíos por Endesa pa cubrir la perda d’emplegu y actividá tres el preslle de la térmica de Lada nun van repercutir na Cuenca del Nalón

El tiempu ta demostrando que’l cacarexáu procesu de “descarbonización” yera, como apuntaron dalgunes formaciones dende’l entamu, un compendiu de falacies: nin esanició contaminación -sigue utilizándose carbón pero con otres procedencies, contaminando amás el puertu de Xixón na carga y descarga- nin creo enerxía llimpia -lo más paecío ye’l proyectu de parques eólicos más dañible para la biodiversidá y el paisaxe nunca plantegáu- nin, poques gracies, recuperó los cientos de trabayos perdíos nel camín

Los principales efeutos reales de la descarbonización foi la perda dafechu de la Soberanía Enerxética asturiana, cola consiguiente indefensión énte les xubíes de preciu de la lluz, y l’esmantelamientu definitivu de les cuenques mineres.

L’últimu guelpe vien de la man d’Iberdrola y la supuesta inversión pa recuperar les zones perxudicaes pol preslle de la térmica. En Lada nun van ver nin un céntimu de los 700 millones d’euros destinaos a esi fin.

La inversión prometía dirá parar a “provisores” de la empresa -lo cual nun ye inversión, sinón gastu d’empresa, yá que siguen siendo provisores de la mesma- y creación de parques eólicos y solares, colos defeutos nos proyeutos qu’apuntemos enriba y qu’amás, van crear malpenes una decena de puestos de trabayu, n’otros conceyos alloñaos de la cuenca.

Como contraste, el plan de futuru d’Endesa nes sos plantes n’Andorra (Teruel) y Cubillos del Sil (Llión) ta dotáu con 1.800 millones d’euros que van acabar nes contornes onde s’atopaben les sos plantes, poniéndose en marcha en Teruel siete proyeutos que van xenerar 160 emplegos direutos con una inversión cimera a 260 millones d’euros, na mesma redolada na que taba la térmica. Nel casu d’Andorra, el plan de futuru d’Endesa cunta con una inversión de más de 1.487 millones d’euros y tien como oxetivu final la consecución de 1.725 megavatios de potencia anovable, de los cualos 1.585 megavatios van corresponder a la que va ser la mayor planta solar en construción n’Europa y 139 megavatios van tener orixe eólicu. En dambos casos los proyectos non solo van caltener l’emplegu na zona, sinón que van caltener la Soberanía Enerxética, al tar basaos na producción de lletricidá.

Nuria Prendes

This work is licensed under a Creative Commons Attribution 4.0 International License.