El certame Al Son del Cantar, entamáu pola Rede de Normalización Llingüística, propón a les escueles la creación de cancios en llingua asturiana y eo-naviego dientro d’un proyeutu d’anovación educativa camentáu pa desendolcar toles competencies de los escolinos
Esti proyeutu preséntase en forma de concursu musical pa los cursos de 4.u, 5.u y 6.u de Primaria y 1.u y 2.u d’ESO, y tien l’envís d’afalar el deprendimientu sinificativu de los escolinos al traviés de la investigación, el descubrimientu y la creatividá nel campu de la música. L’oxetivu ye que l’alumnáu presente un cantar con lletra n’asturianu o eonaviegu escritu por ellos mesmos, sobre una melodía tradicional o sobre una melodía tamién orixinal y propia. Un xuráu va facer la escoyeta de los cantares ganadores, que van ser versionaos por grupos profesionales de la música asturiana.
La Conseyería de Cultura, Política Llingüística y Turismu collabora nel proyectu faciéndose cargu de la producción del discu y de la gala onde se van interpretar los cantares ganadores en directo y que se va facer nel añu 2022.
La propuesta parte d’esta Rede a los cientros educativos de primaria y secundaria de los conceyos d’Avilés, Candamu, Cangas del Narcea, Castrillón, Corvera, Grau, Samartín del Rei Aurelio, Ḷḷena, Xixón y a los de les mancomunidaes de la Comarca de la Sidra, Comarca Ozcos-Eo, Cabu Peñes y Parque Históricu del Navia.
Esti concursu, ya se celebró nuna edición anterior col títulu El mio cantar, teniendo como resultáu un discu que se distribuyó pelos cientros educativos del “Principado” y que ta acesible nes plataformes dixitales.
Redaición InfoAsturies
This work is licensed under a Creative Commons Attribution 4.0 International License.
