Por primer vegá n’años  amenorga el númberu de monumentos asturianos na“Llista encarná” del padremoñu en pelligru de desaniciu qu’espubliza Hispania Nostra, pasando de 29 a 25

Esta Llista recueye aquellos elementos del Padremoñu Cultural que s’alcuentren sometios a riesgu de desaniciu, baltu o alteración esencial de los sos valores, al oxetu de dalos a conocer y llograr la so igua. La so actualización depende de la collaboración ciudadana, que puede informar de la esistencia de padremoñu en pelligru al traviés del formulariu incluyíu na páxina ueb de l’Asociación, que pondrá entós en marcha’l procedimientu de comprebación col sofitu d’un comité científicu que valorará si el monumentu en cuestión cumple los requisitos pa ser incluyíu.

Ta nidio que ta pendiente una fuerte llabor d’información por parte de los asturianos pa poner al díe esti llistáu, ya que son munches más les costruciones que precisen d’una intervención urxente que torgue’l so desaniciu. Sicasí, nun dexa de ser positiva la noticia de que cuatro d’estos monumentos, fasta agora en pelligru de desaniciu, recibieren -unes vegaes gracies a la llabor d’asociaciones y vecinos, otres por mor de la aniciativa privao y dalgunes cola implicación de la Direición Xeneral de Padremoñu cultural- l’atención que necesitaben p’aparar el so deterioru.

La Ilesia de San Salvador de Moru, en Ribeseya,  incluyía nel Inventariu de Padremoñu Cultural d’Asturies y llevantada n’algún intre pente los sieglos XV y XVII ye ún de los monumentos restauraos gracies al enfotu de los vecinos, que tan restaurándola y van ya pola cuarta de seyes fases de remocicamientu necesaries.

El Palaciu de los Carreño Alas, en Sebades, llugar de nacimientu del pintor Carreño de Miranda, ta destináu a ser un hotel, polo que nos caberos meses púnxose igua al problema de teyáu y capa esterior que ponía en pelligru la so integridá.

Otru d’ellos ye’l Monasteriu de San Salvador de Cornellana, de propiedá pública y Bien d’Interés Cultural dende 1993. La Conseyería d’Educación y Cultura, mediante la Direición Xeneral de Padremoñu Cultural, invirtió ya nesta obra 1.016.294,73 euros y finó ya la primer fase del proyeutu de remocicamientu del monasteriu.

La Ilesia de San Miguel de Lillo, n’Uviéu, pertenez gracies a les inmatriculaciones feches pola ilesia católica p’apropiase de los bienes comunitarios, al Arzobispáu d’Uviéu. Declarada Padremoñu de la Humanidá pola UNESCO  en 1985, foron precisos más de 30 años pa que se llevare a cabu la necesaria igua d’urxencia.

Pa finar, el Palaciu de Villanueva, en Cucao, de Llanera construyíu nel sieglu XVII, perteneciente a la familia del conde de Revillagigedo y declaráu bien d’Interés Cultural, de magar 1995 que gracies a los llabores de remocicamientu de los muros esteriores, torre y teyáu, vien de salir de pelligru.

La inclusión previa d’estos monumentos na Llista encarná pudo ser un de los factores qu’afalaren la puesta en marcha de la so igua, llamando l’atención so la so situación, polo que convidamos a tolos llectores a cursar la correspondiente denuncia sobre cualisquier otru casu de pelligru de desaniciu o esbarrumbe del que tean conocimientu.