La Xornada “Dami Tira, Solidaridá y Socialismu n’Asturies d’Anguañu” aconceyó a mediu centenar de persones dimpuestes a comprometese na llucha contra la precariedá n’Asturies. Nes estremaes intervenciones surdieron datos, idegues y propuestes de trabayu pa entamar a movilizar a la población asturiana a la gueta d’esi oxetivu, el de dar a Asturies “un futuru estremáu al que mos proponen”
Na primer intervención, Lola Villacob destacó los problemes concretos a los que s’enfrenten les persones migrantes, especialmente les muyeres, racismu, xenofobia, machismu, acosu sesual … Quienes, como ella, vienen d’una tradición y una vida de lluches poles llibertaes, quieren continuar equí con esa llucha, porque nesti país tovía hai muncho que meyorar y muncho polo que lluchar.
Insistió en dexar atrás los egos y buscar propuestes concretes, de qué forma organizase pa lluchar de forma coordinada pa que les persones podamos vivir en meyores condiciones.
David Rivas, comu profesor universitariu d’economía, cientróse en cuestiones mui concretes, destacando que los tres pegoyos pal desendolcu de la economía asturiana tendríen que ser la agroindustria, l’ anovación, ya’l mediu ambiente, precisamente les que menos se tan sofitando dende’l gobiernu (recién s’espublizó qu’Asturies ye’l territoriu con menor inversión n’I+D del Estáu). Imprescindible tamién, destacó, la recuperación del mediu rural y les formes tradicionales, fixando la población nos pueblos con cuestiones tan básiques comu, por casu, el tresporte. Faló tamién de la necesidá d’implementar una política de viviendes propies, camudar la llei de turismu y dar puxu a la industrialización descentralizao como una ventaxa diferencial. Pa David Rivas munches de les soluciones que necesita güei Asturies ya esistíen va unes décades, pero foron sistemáticamente desaniciaes fasta llevanos a la situación llaceriosa na que mos alcontramos.
La viniente intervención foi la del hestóricu sindicalista de la CSI, Morala, quien llamó a tar en tou momentu en contautu cola xente pa salvar la distancia pente organizaciones ya’l pueblu, recalcando la necesidá de tar na cai, recuperar esi espaciu que se perdió en parte demientres la pandemia, ya que ye urxente l’autodefensa coleutiva nuna situación de precariedá que supera con muncho les estadístiques oficiales. Como alegatu final, llanzó la desixencia de que los gastos militares vaigan destinaos a meyorar el bientar de la población.
Boni Ortiz, integrante d’Anticapitalistes d’Asturies, propunxo tomar alternatives radicales coles persones comu exe y señaló la importancia de xenerar aliances.
La cabera intervención d’esta primer parte tuvo a cargu de Llucía Fernández, de la Executiva d’Andecha Astur, que se cientró en desplicar con una metáfora bélica –la de l’asimilación por asediu- cómu al Estáu Español y a quienes ostenten el poder n’Asturies lo qu’interesa ye una Asturies probe, sumisa, dividía ya insolidaria que nun piense más que’n subsistir y que tea, amás, agradecía de les migayes que se-y apurren. “Negámonos a aceutar el futuru de miseria que diseñen pa nos. Hai alternatives, son posibles, Somos un país ricu, con recursos humanos, con recursos materiales, con capacidá. Lo que nun tenemos ye la soberanía pa poder utilizar esos recursos que son nuestros. Lo que nun tenemos ye’l socialismu pa poder facer una redistribución xusta d’esos recursos. Por eso nosotros falamos de soberanía, pa poder decidir, y socialismu, pa poder redistribuir”.
La so organización, convocante d’esta xornada, entregó a los participantes un llistáu con cien propuestes concretes pa salir de la precariedá, como ferramienta de trabayu alrodiu de la qu’entamar un alderique conxuntu y una llucha en comuña.
Mario Arbesú, presentador del actu, anunció qu’eses propuestes tarán darréu na ueb d’Andecha Astur, pa que tola xente puea comentales y apurrir la so contribución al documentu.
La intervención más esperada de la mañana foi la d’Oskar Matute, diputáu d’
EH Bildu, quien resaltó que nun hai qu’aspirar a crear realidaes pa otros, sinón pal propiu pueblu, y d’ehí, agabitar al restu. Asina, dio l’exemplu del pueblu vascu y la so llucha, que si bien entá continúa, llevólos a tar mui per delantre en drechos y realidaes de la situación asturiana –faló de niveles de probitú del 10%, frente al cuasi 28% que se carez n’Asturies-.
La llucha nes cais, l’espíritu xunitariu, el compromisu coleutivu y l’enfotu de ser una nación con estáu propiu que decida el so propiu futuru son imprescindibles nesti camín, “El camín que tien que recorrer Euskal Herria, y el camín que tien que percorrer Asturies ye un camín que nos lleve hacia un horizonte de llibertá de países, con homes y muyeres llibres ya iguales”.
Darréu les intervenciones, hebio una ronda d’entrugues na que s’afitó l’enfotu de los presentes de llevar eses propuestes a la cai y dinamizar la sociedá pa finar con l’actual situación de sumisión y precariedá.
Nuria Prendes
This work is licensed under a Creative Commons Attribution 4.0 International License.
