Les principales ciudaes d’Asturies van gastar n’ocho millones de bombielles el presupuestu que podría calecer -siquier un pocu- 200.000 llares

Naide que me conoza puede duldar de que me gusta la Navidá. Contra toa lóxica y pronósticu y en seria contradicción col mio natural atéu y antieclesiásticu, l’Espíritu Navidiegu invádeme ca final d’avientu (n’ochobre entá non, por muncho que s’emperren los centros comerciales) y entamo a organizar realcuentros, paseos pola nieve, cartes y casadielles. Mea culpa.

Sicasí, o precisamente por ello, abúltenme particularmente aberrantes les llumes navidiegues. A títulu estéticu, porque la mayor parte del tiempu son namás un marabayu de cables y bombielles amataes ensin gracia nin méritu, al contrariu qu’otros tipos de decoración que s’esfruten 24 hores. Pero sobremanera, a títulu éticu.

Les caberes noticies falen de 4,5 millones de bombielles n’Uviéu, 3,7 en Xixón, ensin qu’haiga gran diferencia ente un gobiernu “de dreches” y otru “sociollistu”. Más de 8 millones, solo en dos ciudaes, abondo p’allumar tolos llares asturianos. Van tar prendíes, toles nueches, mientres un mes, colos precios de la lluz más altos que nunca, nel que va haber n’Asturies más de 200.000 families que carecen probitú enerxético (o probitú, a seques) y que van tener que decidir ente prender la estufa o mercar comida abondo (aldovinen qué van escoyer, qué vamos escoyer); decenes de miles de llares que se van bañar con agua frío, eso si, con ceguños de collores pela ventana. Bien navidiego tou.

A lo peor entendí yo mal de qué diba tou esto de la Navidá, paz na Tierra, bona voluntá, curiar de los neños ensin techu que nacen nun portal ocupáu, recibir con allegría a señores que vienen viaxando dende les llendes del mundu, siguiendo un suañu, compartir, cellebrar y tola pesca. Igual resulta que solo yera una competición a ver quien pon más lluces, quien gasta más perres, quien paga más cenes.

Xicu Llamazares

This work is licensed under a Creative Commons Attribution 4.0 International License.