El xuráu del premiu, que busca reconocer a la meyor composición n’asturianu o eo-naviego espublizada mientres l’añu 2020, escoyó na primer fase del certame, celebrada en xunetu, los cuatro cantares finalistes. Estos son: Tomasín, del grupu ¿Aú?, Flacos y ensin peinar, de la Banda de Gaites Camín de Fierro, Veis volver, del dúu L-R y El que conoz a tierra, de Carla Armas y Rubén García, qu’actuarán na gala xunto col ganaor del añu pasáu, Rodrigo Cuevas.

La gala va retresmitila en directo la TPA y va acoyer les actuaciones de los cuatro finalistes. De siguío, mientres la deliberación del xuráu, Rodrigo Cuevas va tener una actuación de 25 minutos na que va interpretar el cantar ganador de la edición pasada, Rambalín, ente otres del so repertoriu. Tres esta actuación, va anunciase’l cantar ganador y va facese entrega d’un troféu a los sos intérpretes.

El premiu tien una dotación de 6.000 euros y incluye la realización d’un videuclip, asina como la promoción y divulgación del cantar ganador nos medios de comunicación y nos eventos entamaos o promovíos pol Gobiernu  d’Asturies.