El manifestamientu, que superó les espeutatives d’asistencia con más de 35.000 asistentes -sigún fontes policiales-, cuntó cola participación de delegaciones internacionales de formaciones políticas averaes, comu Andecha Astur dende Asturies,  BNG dende Galiza, CUP y ERC dende Catalunya y Mes per Mallorca dende les Illes. Con ello dábase puxu a la llucha y a la xunidá de les naciones ensin estáu baxu’l control del Reinu d’España.
Mensaxes antifacistes, pola independencia o por la llibertá de los presos ficiéronse sentir dende l’entamu la movilización, que finó con intervenciones de Perea -militante d’EH Bildu- ya’l so coordinador xeneral, Arnaldo Otegi.

La primera recalcó el miéu que da a los partíos y medios españolistes l’espoxigue d’EH Bildu, que xustificó porque “Conectamos cola xente, porque en llugar de facer promeses, facemos lo que podemos pa facer coses; colocamos nel centru les polítiques que meyoren les vides de la xente”. “Somos soberanistes de izquierdes, y tamos arguyoses.Y sí, somos feministes y ecoloxistes, diverses y antifacistes. Y por supuestu, queremos repartir la riqueza d’una manera xusto. Nun ye tan difícil», recalcó.

Pel so lláu, Otegui declaró que “L’estáu natural de los pueblos nun ye la resistencia, sinón la llibertá” destacando la capacidá del pueblu vascu de resistir a lo llargo la hestoria toes y cauna de les estratexes que buscaron  facelos desapaecer comu pueblu. Llamó tamién a sumar fuercies pa enfrentar el futuru comu un bloque hestóricu, nacional y popular “Qu’encare’l futuru con confianza ya ensin complexos. Tamos preparaos pa compartir esi lliderazgu y poner en marcha esti país”.

Tou ello tres d’una mañá d’alcordanza a Santi Brouard y Josu Muguruza, con ufrienda floral, ya’l posterior actu d’homenaxe a los mesmos por parte de la Fundación Egiari Zor, que trabaya a favor de los drechos de les víctimes que carecieron la violencia de los Estaos francés y español nel contestu del conflictu políticu vascu.