El xuiciu d’Eduardo López va tener llugar esti xueves 25 de payares, nos xulgaos de Xixón, polo que’l sindicatu CSI entama esi día a les 11:00 una concentración de sofitu al trabayaor y de repulsa a la represión sindical de la que foi oxetu un miembru del comité d’empresa

La llucha que mientres los meses de mayu y xunu del 2020 movilizó Xixón n’esixencia del cumplimientu de los convenios y tasa de reposición de EBHI sigue agora nos xulgaos. Eduardo López ye un de los protagonistes de la fuelga fame na empresa semipública d’estiba, que foi despidíu en rematando’l so contratu relevu, incumpliendo la empresa la tasa de reposición que-yos obliga a caltener el 100% de la plantiya, reponiendo xubilaciones y baxes y convirtiendo n’indefiníos a los trabayadores eventuales, midía acorde a la llei y reconocida en conveniu que de ser aplicada forzaría a la empresa a dexar como indefiníu a Eduardo y al restu los eventuales.

Por cuenta de la cellebración esti próximu xueves día 25 de payares, del xuiciu pol incumplimientu del conveniu per parte la empresa qu’implica’l so despidu, va tener llugar una concentración nel so sofitu. Esti ye’l 5º xuiciu que se cellebra de los 7 eventuales despidíos y la situación reviste especial importancia énte l’atentáu carecíu apocayá pol únicu trabayador que, fasta agora, consiguiere ganar a la empresa nos xulgaos, siendo realmitíu y siendo anguaño miembru del comité d’empresa.

Llucía F. M.

This work is licensed under a Creative Commons Attribution 4.0 International License.