La baxa calidá de la Sanidá Pública yá yera oxetu de reclamaciones antes de la debacle xenerada pol Covid 19, pero les reformes realizaes amparándose na emerxencia sanitaria -anque n’ocasiones seya abegoso ver el nesu de xunión pente andanciu y retayos- dexáronla albentestate, abriendo un campu enorme de beneficios a la sanidá privada

El domingu, centenares de persones reivindicaben n’Uviéu más personal pa l’ária sanitaria de Xarrio y reclamando una Sanidá Pública, digna y de calidá. Concretamente, desixíen un serviciu de xeriatría, imprescindible nuna zona tan avieyao.

Ayeri, otros cientos de persones tornaron manifestase ante la Xunta Xeneral y la see de la Presidencia del Gobiernu, sol lema, «L’Atención Primaria entra en parada. Por una sanidá digna n’Asturies», pa protestar ante’l deterioru que sufre’l sistema d’Atención Primaria, una atención que yá cuntaba con serios defeutos anantes de la pandemia pero qu’agora alcuéntrase nun estáu llaceriosu, con ausencia de mélicos inclusive nes grandes ciudaes, rotación de cutiu de facultativos, retrasos nes cites méliques, aumentu de l’atención telefónica y supresión del servicios d’urxencies en centros de salú.

La dispersión xeográfico y l’avieyamientu de la población de les zones rurales, aporfiaron los manifestantes, son agravantes del problema. Resaltaron el fechu de qu’hai conceyos onde se ven afeutaes pola falta d’atención primaria families enteres, dalgunes con neños y toes con vieyos, a los que se-yos ta quitando de servicios fundamentales como l’atención pediátrica y xeriátrica.

Una de les consecuencies d’esti progresivu deterioru de la salú pública ye que los vecinos de distintes partes de la xeografía asturiana vense obligaos a movese a otros centros de salú pa recibir l’atención sanitaria que precisen. Otra d’elles, que los que puedan pagalo vaigan a centros privaos, beneficiando a la sanidá privada y xenerando un elitismu de la salú, ello ye, ampliando la fienda sanitaria en función de los ingresos económicos, lo que ye contrariu en tou puntu a la filosofía de la sanidá universal na que s’enconta la idega de la sanidá pública.

Los manifestantes apurrieron un manifiestu empobináu al presidente del Gobiernu, Adrián Barbón, y a la Conseyería de Salú, liderada por Pablo Fernández, nel que resumíen les sos desixencies.

Nuria Prendes

This work is licensed under a Creative Commons Attribution 4.0 International License.