Ganaeros y agricultores manifestáronse ayeri peles cais d’Uviéu. Ficiéronlo con tractores, vaques, oveyes y caballos, dexando dacuandu parves de cuchu pela capital pa llamar l’atención sobre los graves problemes que carez el sector

La asfisia al mediu rural ye costante y global, denuncien nel so manifiestu, nel qu’alerten del desaniciu de la más tradicional forma de vida d’Asturies.

Los precios irrisorios a los que se yos paga los productos, en dellos casos perbaxo mesmo del coste de produción súmense a un cúmulu de desixencies -xestión de purines, distancia de les cuadres… – qu’obligarán nuna xeneración a presllar decenes d’esplotaciones.

Denuncien a toles alministraciones y gobiernos, tanto asturianu como español por abandonar la zona rural, desabasteciéndola de los servicios más básicos, comu educación, tresportes, comunicaciones o atención sanitaria, faciéndo la vida nos pueblos ca vuelta más díficil y forciando con ello a la emigración hacia les ciudaes.

Enxamás nun hebio tantes razones pa manifestase, decíen na so convocatoria, asina qu’ayeri baxaron a la Capital más de 1.500 ganaeros y agricultores, con 227 tractores y decenes d’animales (vaques, perros, oveyes, cabres…) y percorrieron Uviéu, dende Llamaquique fasta’l Palaciu de Gobiernu, a la voz de “Asturies entera ye ganaera”.

Nel so camín tamién tocaron llueques y xiblatos y espardieron cuchu pela carretera, comu forma de protesta.

Llucía F. Marqués

This work is licensed under a Creative Commons Attribution 4.0 International License.