Tres l’ésitu del manifestamientu cellebráu en Xixón el llunes 6 d’avientu, desixendo un aire que pueda alendase y que les alministraciones cumplan coles sos obligaciones, la plataforma ta preparando yá los sos prósimos movimientos, que se van concretar na xunta que tendrá llugar el martes 11 de xineru de 2022 a les 19:00 nel Atenéu La Calzada
Na mentada xunta, que ta abierta a quien quiera collaborar na defensa d’un aire más llimpio pa los xixoneses, van tratase delles temes.
Unu de los puntos más interesantes a tratar, dempués de faer una valoración conxunta del resultáu de la reciénte movilización, va ser la presentación d’allegamientos énte la Propuesta de cambéu del Plan d’acción al curtiu plazu pal amenorgamientu de los niveles de partícules en suspensión na atmósfera na zona oeste de Xixón, que, pa la Plataforma, ta plantegada en función de los deseos ya intereses d’Arcelor. “Al par de la Coordinadora Ecoloxista de Asturies, Ecoloxistes n’Aición, y otres persones concenciaes del grave problema que significa esti pidimientu d’Arcelor, la Plataforma vamos presentar allegamientos énte otru intentu d’atropellu per parte d’un de los mayores responsables de la contaminación na contorna de Xixón” afirmen, animando a los asistentes a la xunta a presentar tamién allegamientos.
Llucía F. Marqués
This work is licensed under a Creative Commons Attribution 4.0 International License.
