Esti domingu 26 d’avientu Andecha Astur honrará l’alcordanza del poeta asturianu Andrés Solar (1955/1984) poniendo especial enfotu na so faceta política y humana

La cita ye esti domingu a les cincu la tardi, a les puertes del Cimenteriu de Deva. Allí, Andecha Astur, homenaxeará como cada añu la so figura, resaltando’l so compromisu nacionaliegu, lleendo dalgunes de los sos poemes más conocíos y con una ufierta floral frente a la placa que la organización llantó hai años na so alcordanza a la entrada del campusantu.

Traxicamente fináu con namás 29 años, na so curtia vida Andrés Solar amosó una capacidá creativa, una claridá mental y una capacidá de compromisu pa cola causa asturiana estraordinaries. Amás de poeta, Andrés fore miembru fundaor del Ensame Nacionalista Astur, presentándose por esi partíu como candidatu a la Xunta Xeneral, foi  profesor de llingua asturiana na UP de Xixón,  espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi tesoreru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana, siendo en tou momentu un referente pola so implicación, capacidá de trabayu y cualidaes presonales.

Andecha Astur cellebra añalmente esti homenaxe, comu organización heredera del ENA (Ensame Nacionalista Astur), fundao pol mesmu escritor, pero tamién a títulu personal, ya que munchos de los componentes d’esta organización nacionaliega tienen a honra ser compañeros y collacios d’Andrés Solar nos anicios de la llucha polos drechos nacionales y llingüísticos d’Asturies.

Llucía F. Marqués

This work is licensed under a Creative Commons Attribution 4.0 International License.