La Estaya la Llingua y el Conceyu d’Avilés en collaboración con Reciella Families pol Asturianu arrincaron va dellos meses con una bona propuesta pa la reciella
El proyectu tien por nome “La reciella de la Factoría (na rede) 2021” y trátase de representaciones teatrales pa neños y neñes un sábadu al mes, dientro les sos campañes de normalización de la llingua asturiana. Anantes de la pandemia, esti ciclu facíase dientro les programaciones de la Factoría Cultural d’Avilés.
Les representaciones, d’alredor de 45 minutos tán disponibles na canal de Youtube de PlayPresta, otru de los collaboradores d’esta programación. Les obres que se representen nesti ciclu fueron premiaes en dalgún casu, polo que la so calidá ye bien bona. El viaxe de Covaletti, interpretada por Hixénicu Papel Teatru, consiguió’l premiu OH! de les Artes Escéniques d’Asturies 2014 al meyor espectáculu infantil.
Les representaciones yá estrenaes pueden vese clicando nesti enllaz nel momentu que se deseye, pero inda queda una obra por estrenar:
El 8 de xineru del añu 2022 llega “Güelina”, d’Ana Morán. Un cuentacuentos enel qu’una güela máxica, que tien munchos años y cuasi venti nietos a quien da ciñu ensin fin. ¿Cómo ye que sigue teniendo tanta fuerza pa ser quien a ello?.
Redaición InfoAsturies
This work is licensed under a Creative Commons Attribution 4.0 International License.
