La Panificadora allugada n’El Berrón ye otra de les munches empreses asturianes que quiebren pol alza los precios de la enerxía y les materies primes
Tres de 70 años faciendo pan, la cayía de ventes causada pol preslle de la hostelería, pente la que tinía una importante vecería, foi el primer pasu pa la ruina. Sicasí, calteníase coles ventes en supermercaos y los contratos con colexos y xeriátricos.
Pero nun foron quien a aguantar esti caberu quite, la descomanada xubía del preciu de la lluz y de les materies primes, que faen inviable la continuidá del negociu. El pasáu 22 d’avientu la Panificadora amataba los fornos y anunciaba que solicitará’l concursu voluntariu d’acreedores.
Nesta empresa trabayaben quince persones, que lleven ya cuatro meses trabayando ensin cobrar. Amás, d’ella dependía un despachu de pan nel que trabayaba una persona por cuenta propia y que tamién ta abocáu al preslle, colo que son 16 los afeutaos direutamente pola fin de la so actividá. Pal conceyu ye un pasu más nel desaniciu del so texíu socioeconómicu.
Nuria Prendes
This work is licensed under a Creative Commons Attribution 4.0 International License.
