El brinde navidiegu, como vien siendo habitual, va realizase pedricando col exemplu, apostando por productu’l País con DOP Sidra d’Asturies (esplumosa), ellaborada con mazana 100% asturiana

El clásicu brinde navidiegu de los alcaldes de la Contorna de la Sidra, nel que participen ca añu los seis ediles de Bimenes, Cabranes, Colunga, Nava, Sariegu y Villaviciosa xunto col Presidente del Conseyu Regulador DOP Sidra d’Asturies, tuvo centráu esta mañana na presentación del nuevu plan turísticu aprebáu pola conferencia sectorial del turismu, que la pasada selmana resolvía incluyir a la mancomunidá como receutora d’una importante cantidá de fondos para desendolcar dellos proyeutos.

En concretu, la Comarca la Sidra va disponer de 3.325.000 euros pal desendolcu del plan de caltenibilidá turística en destín y como destín turísticu intelixente. El plantegamientu d’esti programa básase na puesta en marcha de delles actuaciones pelos distintos conceyos col envís de facer más competitivu’l sector turísticu y afitalu como tractor de la economía llocal.

Ente les midíes contemplaes ta l’habilitación d’áries de descansu p’autocaravanes, midíes de movilidá y acesibilidá en llocalidaes como Llastres o Tazones y l’adecuación y acesos a rutes como Peñacabrera en Cabranes o la sierra de Peñamayor. Amás, van ameyorase los sistemes de llume de dellos edificios y monumentos en tolos conceyos de la Contorna de la Sidra n’ares d’algamar una mayor eficiencia enerxética.

Van anovase tamién los conteníos de los museos de Nava y Villaviciosa, ameyorándose les istalaciones de los centros de receición de visitantes asina comu estremaos espacios públicos y d’interés nel núcleu de Villaviciosa, incluyendo l’allugamientu d’elementos teunolóxicos interpretativos.

Redaición InfoAsturies

This work is licensed under a Creative Commons Attribution 4.0 International License.