La policía allegó con coches y furgonetes a desallugar a miles de persones que nun fueron vacunaes, depués de ser forciaes a aceutar la vacuna y d’esperar coles d’hasta trés hores

Pesi a de les campañes animando a la vacunación, consiguir el pinchazu y con ello’l pasaporte -en munchos casos imprescindible pa trabayar- ta siendo un auténticu retu para munchos xixoneses. Ayeri mesmu tuvo llugar la nueva sesión de vacunación colleutiva, una a la selmana, cuatro hores, con namás  trés persones vacunando.

Anque l’horariu de vacunación yera “de 4 a 7” a les cuatro menos cuartu la cola arrodiaba ya’l Palaciu de los Esportes de Xixón, corrierase la voz y fueron munchos los que s’adelantraron p’asegurase la vez. La práutica imposibilidá de consiguir cita telefónica foi ensin dulda detonante por que se diere l’aglomeración nel horariu de vacunación llibre.

Na cola, persones de toles edaes, esperando pa poner la primera, segunda o tercer dosis, ensin distinciones. Destacaba la presencia de persones bien mayores, con dificultaes motrices, en busca de la vacuna de refuerzu, qu’hubieron d’esperar xuntu al restu. D’ente los demás, la mayoría buscaba’l pasaporte COVID por cuestiones llaborales, principalmente personal d’hostelería y ximnasios. Munchos tuvieron que dar la vuelta, al negáse-yos la vacuna por pasar el virus nos caberos meses, ensin que se-yos diera una solución pa poder trabayar. Alredor de les cinco y media una muyer preñada abandonaba la cola, incapaz de siguir, mientres los neños qu’acompañaben a les sos madres entamaben a ponese cafiantes. Un home de 84 años rellataba’l so casu: yera’l so segundu día ellí, el primeru, con cita, esperara dos hores y mandarenlu de vuelta a casa, porque s’acabaren los viales de refuerzu.

La cola avanzaba adulces y alredor de les seis y media la molición entamó a apoderase de los presentes ¿presllaríen les puertes a les siete, dexándolos fuera? La opinión xeneralizada yera que, cuidao que siguía llegando xente y naide  informaba, lo más probable yera que l’horariu implicare qu’a les siete presllaren les coles y siguiera vacunándose hasta la finalización d’estes. Abultaba imposible un horariu tan curtiu.

A les siete menos diez entraron les persones que llegaren a les cuatro en vilu a la cita. A les siete menos cinco presllaren les puertes, esto ye, naide que llegare al Palaciu diez minutos dempués de la hora d’entamu de la vacunación pudo entrar. Naide avisó, pesi a tar viendo a miles de persones esperando, dengún cartelu indicaba’l furrulamientu de les coles o alvertía del zarru de puertes. Más allá de la ineficacia operativa del SESPA, la falta d’empatía de los trabayadores sanitarios impautaron a los presentes ¿nun pudieron avisar na puerte una hora antes, aforrando la espera? Ensin dulda ayeri nun foi’l primer día qu’asocedió esto.

La reación de los que se quedaron nes puertes, lo mesmo que de los que taben yá dientro, foi de plasmu, primero, y de cabréu, dempués. Delles persones cutieron les puertes mientres se presllaben per dientro (nin siquier yera la hora) y llevantóse un coru de comprensibles protestes airaes. Eso foi tou. Nada, al mio entender, que xustificare la irrupción de trés coches y dos furgonetes de policía desallugando, non ensin violencia, a los presentes.

De la que vía a la xente tornar pa casa, cansaos, frustraos, cola tiesta gacha y los puños aprietaos por nun poder poner la vacuna que nun queríen poner pero que tienen que poner, pensaba otra vuelta eso tan famoso de que la realidá supera siempres a la ficción.

Llucía F. Marqués

This work is licensed under a Creative Commons Attribution 4.0 International License.