L’ária afeutao pola fuerte contaminación d’esti entamu d’añu acueye a más de 600.000 habitantes, el 60% de la población asturiana
D’alcuerdu a los datos oficiales que facilita’l Gobiernu de Asturies sobro la contaminación atmosférica y calidá del aire na so web Llangréu, Uviéu y Xixón lleven díes superando los niveles aptos pa la vida de trés contaminantes: bencenu, partícules PM2’5 y PM10. Nin el “Principado” nin los Conceyos tán tomando les preceutives midíes preventives nin activando los protocolos anticontaminación
Especial gravedá reviste la fuerte presencia de bencenu n’Uviéu (media de 9,8 µg/m3) y Llangréu (media de 6,8 µg/m3), sostancia pa la que la OMS encamienta valores de cero añal y España dexa hasta 5 µg/m3 de media, valor que n’Uviéu cuasi se dobla, siendo conocíos los efeutos canceríxenos d’esti compuestu químicu. Recordemos que cuando falamos d’Uviéu referímonos (según la zonificación utilizada pol (“Principado”) a la zona qu’entiende la totalidá de los conceyos d’Uviéu, Noreña, Sieru, La Ribera, Llanera y, parcialmente Morcín, con una estensión de 542,87 km y una población de 296.455 habitantes.
Les micro partícules, tantu les de tamañu menor de 2,5 micres como les de 10 micres, tán disparaes tamién dende l’añu pasáu, siendo Llangréu el conceyu más afeutáu poles primeres, multiplicando por 8 los valores encamentaos pola OMS, y Xixón onde más afeuten les segundes, siguida bien de cerca por Avilés y Llangréu.
Énte esta situación, la Coordinadora Ecoloxista d’Asturies reclamó a los respeutivos Conceyos y al Gobiernu d’Asturies qu’activen darréu el protocolu de contaminación, siquier en Xixón y Uviéu, yá que se cumplen sobradamente les condiciones d’activación especificaes nel mesmu
La esposición a la contaminación del aire ta acomuñada tamién cola medría d’enfermedaes respiratories y cardiovasculares. La población que vive en condiciones de vulnerabilidá, los neños menores de cinco años, los adultos mayores y les persones con preesistencia d’enfermedaes respiratories y cardiovasculares sufren los efeutos más nocivos de la contaminación del aire, agravando tamién les consecuencies del Covid. Hai que recordar que llevamos munchos años presentando los peores datos de partícules del Estáu.
Redaición InfoAsturies
This work is licensed under a Creative Commons Attribution 4.0 International License.
