Nun dexa de ser una cifra simbólico, pero ye una barrera que se france  y que marca un rumbu esmoleceor. La mayor cayía de población correspuende a les edaes d’ente cero y diez años, mientres que los centenarios triplicaránse anantes del 2.031

Tamién en 1960 Asturies rondaba’l millón. Teníemos entós furrulando la minería, la metalurxa, los astilleros, la ganadería y la pesca, un cientu d’empreses con futuru y malpenes paru, Asturies taba xorreciendo. Alcontramonos agora nel mesmu puntu del gráficu no que cinca a población, el millón escasu, pero nel camín contrariu, el de baxada, y non solo en númberu de moraores.

1981 foi l’añu en qu’Asturies algamó’l so másimu poblacional, con 1.129.556 asturianos nel territoriu. L’entamu de les sucesives “reconversiones” auspiciaes polos tamién sucesivos gobiernos del PSOE marcaron l’aniciu del declive ya’l 2021 entamó con 1.013.018 habitantes, 5.881  menos que un añu anantes. Seique entá nun hai datos oficiales disponibles, la proporción costatada de tres muertes por nacimientu a lo llargu l’añu, con un 6’4% menos de ñacimientos y un 0’6% más de muertes afita una perda al menos igual nel 2021 y de siguir al ritmu marcáu el 2022 remataría la baxada, dexandomos perbaxo’l millón.

La sangría costante de xente mozo fae que nesi millón la proporción de muyeres fértiles seya d’escasamente 60.000 asturianes, de les que una bona parte nun tan dimpuestes a tener fios entantu la situación económica y llaboral del país nun yos permita caltener un nivel de vida digno. Ye la hestoria d’un xenocidiu anunciáu que naide nun quiso ver cuando se taba a tiempu d’aparar y qu’agora nun pue revertise si nun ye creando les condiciones pal retornu de la mocedá emigrao.

Remembremos qu’Asturies tien una de las cifres más elevaes de perda de población na esnala ocidental del continente. Comu novedá nos datos, la perda de población desplázase de les fasteres rurales a les urbanes, siendo l’ária metropolitana d’Uviéu y Xixón la que más porcentaxe de población perdió del Estáu.

Llucía F. Marqués

This work is licensed under a Creative Commons Attribution 4.0 International License.