Les dos muyeres fueron deteníes pola Brigada d’Información cuando apoyaben a una de les trabayaores de la pastelería, que denunció al so propietariu por abusos llaborales y acosu sesual

Denuncien que durante la detención, recibieron berros y menacies “pretendieron usar  esta detención inxustificada dafechu a mou d’avisu a navegantes”.

Dende la CNT informen, amás, de qu’entrambes formen parte de la delegación pa la negociación cola empresa, que ya menaciare con “tirar de los sos contautos na Brigada d’Información”, daqué que fai entá más raro’l fechu  de que l’empresariu tuviere esperando a la puerta de comisaría cuando llegaben les deteníes nos coches policiales.

El conflictu cola Pastelería LA SUIZA parte de la denuncia d’una de les sos emplegaes, qu’ afirma que durante dos años tuvo faciendo alrodiu de 80 hores estres al mes obligatories, ensin remunerar, denegándose-y asinamesmo’l drechu a vacaciones.

Arriendes d’ello según pallabres de la trabayaora –que cuenta con un informe mélicu nel que se confirmen los abusos- les vexaciones de calter sesual yeren avezaes na pastelería, con comentarios y entrugues so la so ropa interior y menacies del tipu“si pierdes tal apuesta desnúdeste”, siendo vezu que recibiere wasaps personales, dalgunos incluso con imáxenes o insinuaciones sesuales.

Lo que finalmente llevó a la trabayaora a denunciar la so situación foi la denegación d’atención durante’l so embarazu, nel que llegó a sufrir dos menacies d’albuertu.

Güei fina la baxa por maternidá d’esta trabayaora, ensin que se-y concedan les vacaciones adeudaes ni denguna otra solución pala so situación, polo qu’a lo llargo de los dos caberos díes les concentraciones a la puerte la pastelería son continues, pesi a les detenciones a presones participantes nes mesmes.

Por tou ello la CNT convoca un boicot ciudadanu a esta pastelería.

Llucía F. Marqués

This work is licensed under a Creative Commons Attribution 4.0 International License.