Na entrevista concedía a The Guardian Alberto Garzón cita dieutamente la ganadería asturiana comu ecolóxicamente caltenible, estremándola de les macrogranxes que, comu ye aceutao a nivel mundial, dañen mediuambientalmente l’entornu, ufren emplegu de baxa calidá, traten mal a los animales y tiren los precios. De fechu, nes declaraciones recomienda’l consumu de carnes, comu l’asturiana, procedentes de la ganadería estensiva, faciendo promoción de la marca de calidá asturiana.

Sosprendentemente, en llugar d’aprofitar l’alderique pa poner en valor la calidá de marques comu la IGP Xata Roxa -comu ficieron, por exemplu, dende la IGP Carne de Ávila- Adrián Barbón antepuso los intereses del so partíu y, sofitando los lobbies cárnicos, posiciónase en contra d’Alberto Garzón, equiparando toles formes de ganadería y calificando d’inoportunes les sos declaraciones.

Certifícase con esti alderique l’allonxamientu del PSOE de los oxetivos de l’Axenda 2030 en materia de caltenibilidá, qu’aboga por impulsar y priorizar a la ganadería extensiva, dexando tamién nidio qu’anteponen los intereses económicos de los que más tienen en contra de los piqueños productores. No que cinca a Asturies, rescampla la priorización de los intereses españoles perriba los propios.