La sentencia, que sienta xurisprudencia, podría frenar el peraltu grau d’interinidá del personal docente y de salú n’Asturies

La contratación temporal pa cubrir necesidaes non coyunturales ye illegal. Sicasí, ye una práutica avezada non solo n’empreses, sinón na función pública asturiana, bien concretamente, n’Educación y Salú, onde’l grau d’interinidá ye tal qu’una plaza puede tar cubierta d’esta manera mientres años, ensin que se saque a concursu públicu la plaza fixa.

Los xulgaos en primer instancia y la Sala de lo Contencioso-Alministrativo del Tribunal Cimeru de Xusticia refugaren toles reclamaciones presentaes nesti sen por emplegaos públicos, incluyendo les numberoses realizaes de magar el 2018 contra’l Sespa.

Agora, el Tribunal Cimeru llama l’atención al Serviciu de Salú del Principáu de Asturies (Sespa) por abusu de temporalidá na contratación de personal médico nel Serviciu d’Atención Continua, fallando en contra de dos sentencies dictaes polos xueces en Asturies, y determina que’l personal nesta situación tien drechu a caltener el so emplegu. Estes sentencies sienten xurisprudencia, afirmando qu’estes contrataciones suponen un abusu de contratación temporal.

El Supremu afita, amás, que “quien se topó n’una situación d’interinidá oxetivamente abusiva tien drechu a la subsistencia de la relación d’emplegu” y que nada torga al llexislador regular compensaciones económiques a los interinos.