L’equipu de vacunación del “Principado” cunta dende la selmana pasada con sofitu militar, en concretu del Exércitu de Tierra, tornando asina la contratación de sanitarios

Un reten sanitariu del Acuartelamiento Cabu Noval foi montáu nel parking 3 del HUCA, onde’l Serviciu de Salú del “Principado” (SESPA)  tien dellos puntos de vacunación. La so misión, realizar llabores médiques, pa les que nun tienen la correspondiente formación, dientro del programa de vacunaciones “voluntaries” y dosis de refuerciu.

Mentanto, los profesionales sanitarios asturianos emigren por falta d’emplegu o en busca de meyores condiciones y cientos d’estudiantes deseosos de cursar Medicina na Universidá d’Uviéu resígnense a otra opción énte los númberos clausus que incomprensiblemente torguen formar más médicos y enfermeres n’Asturies.

La presencia militar nun foi abonda en cualquier casu p’acabar cola llarga espera al frio de les persones qu’allegaron al ‘VacFriday. Eses coles aportaron dellos díes a más de trés hores, dempués de les cuales les puertes preslláronse dexando a cientos de ciudadanos  ensin ser vacunaos -y por tantu ensin el pasaporte que-yos dexaría desenvolver la so actividá con normalidá-.

Nuria Prendes 

This work is licensed under a Creative Commons Attribution 4.0 International License.