Tar internacionalmente reconocios como los meyores, con una ganadería pente les meyores cien del mundiu, nun basta a los ganaeros asturianos pa que’l so Presidente, Adrián Barbón, atienda les sos reclamaciones d’un preciu xustu pa la so produción llactea
Asturies tien otra raza, la frisona nun ye la vaca autóctona, representando namás el 28% de la cabaña bovina asturiana. Sicasí, el 27% de les meyores ganaderíes d’esta raza alcuéntrense n’Asturies, como reconoz la Confederación d’Asociaciones de Frisona na llista qu’ellaboró coles 100 meyores esplotaciones por calificación final en 2021.
Pesi a qu’otros territorios cunten con munches más esplotaciones d’esta raza qu’Asturies, les ganaderíes asturianes afararon, apaeciendo destacaes ventisiete esplotaciones asturianes, seis d’elles pente les quince primeres, toes elles de ganadería estensiva. Les esplotaciones gallegues de vaca frisona, entá siendo muncho más numberoses, consiguieron 25 puestos. Amás, el semen de los sementales asturianos ta perbien cotizáu, dende la cooperativa Ascol esportenlo pa 22 países, anque reconocen que non tou ye xenética, l’alimentación, el manexu, la pación… tou inflúi.
El primer puestu del ranking ocupalur la ganadería Badiola, na localidá de Condres, qu’algama una puntuación de 87,61 de media pa les 343 vaques calificaes, d’un másimu de cien puntos, tando la media en 77. Almirada por tolos que se dediquen al mundu de les vaques llecheres, Badiola tuvo al frente del ranking de Conafe nes trés ediciones en que s’espublizó, escoyóse-yos 25 vegaes como los meyores criadores del estáu nes caberes cuatro décades, les sos vaques fueron consideraes los meyores pola so morfoloxía en 13 ocasiones y apaecen nel ranking de les cien ganaderíes más influyentes del mundu.
Amás de Badiola, nel primer puestu, apaecen na llista de Conafe les siguientes esplotaciones: Casa Flora (4º.), Toño Patallo (8ª.), Casa Viña (10º.), Ganadería Cantina (12º.), Ganadería Manolero (13º.), El Pedregal (24º.), Ganadería Casa Venturo (27º.), Samasilva (31º.), Casa Coto (32º.), Ganadería Ventura (36º.), La Pienda (41º.), Llarriba (48º.), Ganadería Eloy (53º.), Casa Luis (55º.), Llucho (56º), Ganadería Nogal (57º.), Ganadería Casimira (61º.), Ganadería Fele (63º.), Ganadería Bernabé (72º.), Casa Petu (73º.), Los Abedurios (76º.), Casa Ferreiro (85º.), La Soledá (87º.), Ganadería Baldomero (88º.), Casa Celedonio (90º.) y Ganadería Los Lloreos (91º.).
Vitor Corte
This work is licensed under a Creative Commons Attribution 4.0 International License.
