El Sindicatu d’Estudiantes d’Asturies, el sindicatu docente Suatea, el Movimientu Social pola Escuela Pública, y la Federación Asturiana de Pás d’alumnos (FAPAS) de Xixón vuelven a llamar al boicot de los esámenes de “reválida”, convocaos pola Conseyería d’Educación pa los díes 23 y 24 de mayu
La comunidá docente asturiana ya amosare na anterior convocatoria la so refuga a la convocatoria de les evaluaciones de diagnósticu, conocíes popularmente como reválides y esti añu reiteren la so oposición a esti sistema d’evaluación cuya superación ta lligada al algame del títulu d’ ESO y Bachilleratu y camuda’l sistema d’acesu a la Universidá.
Pesi a que’l modelu foi camudáu tres les abondoses manifestaciones estudiantiles del añu pasáu, el fechu ye qu’esti añu los escolinos tornen a tar convocaos a facer estes prebes qu’evaluarán les aptitudes y conocimientos algamaos durante la etapa correspondiente.
Los sindicatos reiteren esti cursu la so llamada a la desobedencia escolar, pidiendo a los Pás que nun manden a los sos fíos a los centros escolares los díes 23 y 24 de mayu, díes nos que tendrán llugar les prebes de diagnósticu. Afirmen que la non asistencia masiva a les mesmes nun tendrá consecuencies negatives pal alumnáu, mientres que la realización de los esámenes crearía un precedente qu’afitaría les revalides nel calendariu escolar.
Redaición InfoAsturies
This work is licensed under a Creative Commons Attribution 4.0 International License.
