La falta de voluntá política pa revindicar la Oficialidá como un drechu irrenunciable lleva a Asturies a otru callexón ensin salía, perdiendo otra oportunidá hestórica 

Depués de perder tolos plazos pa xestionar correchamente la reforma l’Estatutu y tres de pasar la llexisllatura retrasando’l pasu del dichu al fechu con declaraciones valeres y semeyes pa la prensa, Adrián Barbón llanza a cabera hora l’alderique la oficialidá. El pueblu asturianu recibe con ilusión la noticia, pero son munches les voces que ya nesi intre llamen a festexar con prudencia: los plazos son xustos, los precedentes malos, la voluntá dudosa.

Dos nun negocien si ún nun quier y nesta enésima traición al pueblu asturianu son cuatro los implicaos, PSOE, IU, Podemos y Foro, enrocaos nos sos papeles y allugando la reconocencia de la oficialidá nun planu políticu y negociable, en ningún intre falando d’ello comu’l drechu irrenunciable que ye. La imposibilidá d’algamar un alcuerdu favoratible amuesa l’escasu enfotu de toos estos partíos por conseguir la Oficialidá, una cuestión que si bien tanto unos comu otros remanaron con fines elleutorales, a la hora la verdá demuéstren que nun ta pente les sos prioridaes.

Foro facilitó la esculpia perfecha tres de la que parapetase pa caltener esti drechu en dique secu ya’l restu de partíos disimularon a dures penes el so aliviu “porque nel fondu nun-yos interesa lo más mínimo reconocer al pueblu asturianu una seña d’identidá tan importante, y porque ven la oficialidá –toos ellos- como un recursu políticu que pue ser remanáu con vistes elleutorales” denuncien dende Andecha Astur, única organización que defende la Oficialidá dende l’aniciu.

Esti partíu, que ya nun entamu amosó la so desconfianza so les vraeres intenciones de partíos que, comu’l PSOE, formaron siempres parte activa de la represión llingüísitica, teme agora que si la presión social forciare un alcuerdu, esti roblaríase con prieses ya ensin garantíes, “permitiendo una oficialidá de mínimos, ensin reconocencia de drechos plenos pa los falantes y por supuestu, que permita esgayar del troncu del asturianu a les fales del ocidente, como pasu previu a la so definitiva galleguización”.

Nuria Prendes

.

This work is licensed under a Creative Commons Attribution 4.0 International License.