Cellebremos el manifestamientu del 16 d’ochobre convencios de que diba ser el caberu. Enquivoquémonos. El tres de febreru, hai una cita polos drechos llingüísticos alrodiu la Xunta Xeneral
Los más de 30.000 asturianos que salieron a la cai el 16 d’ochobre del 2021 taben convencios del so trunfu, convencios de la Oficialidá darréu, seguros de que l’añu viniente (esti) diben poder falar la so llingua en tolos ámbetos, estudiar n’asturianu, vivir n’asturianu. Taben ciertos de que -parafraseando a Barbón- diben falar la llingua de los sos güelos, pero tamién de que -superando’l mensaxe del presidente’n munches milles- taben falando la llingua de los sos bizñetos.
Agora ya nun lo tienen tan nidio.
Adrián Pumares apurre una esculpia perbona a Adrián Barbón ya’l so séquitu “negociador” y faen tremar les posibilidaes, nun pulsu arriesgáu nel que se puede perder la oportunidá de conseguir la reconocencia de los drechos llingüísticos o, quiciás peor, cayer na trampa d’una Oficialidá mal enfocada, ensin garanties, que nun seya lo bastante fuerte pa enfrentase a inxerencies esternes, ya seyan españoles o gallegues.
Poro, porque’l Pueblu Asturianu ta más que fartu d’esti bailiquín (“un pasín p’alantre, María, un pasiquín p’atrás) col que xueguen coles sos voluntaes, convócase una nueva movilización pola Oficialidá esti 3 de febreru a les 19:30, alrodiu la Xunta Xeneral.
Llucía F. Marqués
This work is licensed under a Creative Commons Attribution 4.0 International License.
