Les polítiques aplicaes les últimes décades polos socesivos gobiernos del PSOE llevaron a Asturies a pasar de ser una prometedora potencia industrial a depender casi puramente del inestable y precariu seutor de la hostelería ya’l turismu pa subsistir

La cabera edición del informe añal sobro’l sector fabril ellaboráu pol Conseyu Xeneral d’Economistes d’España, el Conseyu Xeneral de Colexos Oficiales de Graduaos ya Inxenieros Téunicos Industriales (COGITI) y l’Universidá Católica de Murcia (UCAM) reflexa qu’Asturies yá nun ye  -tampoco- una potencia industrial, nun figura yá nin siquier ente les áries de mayor perfil fabril del Estáu, posición que tradicionalmente-y correspondía, atopándose siete puntos perbaxo l’oxetivu marcáu pola Xunión Europea pal 2020, un pesu industrial total equivalente al 20% del PIB. Colos caberos datos disponibles, el subseutor de la industria manufacturera asturiana equival al 13,8% del so PIB, el 17,9% si sumamos la produción enerxética. En 2000  esta cifra yera del 22,9% y en 1986, el 36,48%.

Esti descensu traduzse’n más de 25.000 puestos de trabayu perdíos na última década, dando ocupación al 13’9% de los asturianos (d’alcuerdu a la EPA, Encuesta de Población Activo), porcentaxe que cai añalmente en siquier un puntu. La industria ye’l seutor que más puestos perdió n’Asturies nos caberos años.

La industria xenera empleos de calidá, estables y al llargu plazu, siendo un de los seutores menos vulnerables a crisis y recesiones, tolo contrario al seutor terciariu, centráu nel turismu y l’hostelería, que va ganando puestos n’Asturies y que da llugar a trabayos precarios ya inestabilidá económica.

Nuria Prendes

This work is licensed under a Creative Commons Attribution 4.0 International License.