La rede d’Atención Primaria ta n’arba. Los médicos contrataos nun son abondos y nun pueden dedicar a cada paciente’l tiempu y l’atención que precisa, falten recursos materiales, teunolóxicos, formativos y humanos

Nun hai tantos años desque podía dise al mélicu ensin cita previa, coyer númberu, sentase y ser atendíu esa mesma mañana por un doctor/a, que podía dedicate si fuera necesario diez o venti minutos ensin qu’ello implicara restá-ylos al siguiente paciente. Agora non solo ye necesaria la cita previa, sinón que consideramos normal qu’esa cita seya pa dientro dos, trés o cuatro díes, o que seya telefónica y en dos minutos faigan recuentu someru de los nuesos síntomes pa recetarnos un xenéricu y esborriar ensin más un paciente de la llista de trabayu pendiente.

Una vegada atendíos -polo xeneral con prieses, por un facultativu devasáu de trabayu y en munchos casos desmotiváu- vamos pasar a la siguiente pantalla, esperando indefinidamente por una radiografía, una preba, una cita col especialista.

Los pacientes nun atopen na rede primaria la solución al so maltar y quien puede va a la privada, dexando que pasu ente pasu la Sanidá Pública tea convirtiéndose nun serviciu pocu más que de beneficencia, siguiendo’l modelu norteamericanu.

Les alministraciones escúdense pa xustificar la falta de contrataciones na escasez de médicos de familia, pero coles mesmes la bolsa d’emplegu a la que tán apuntaos médicos asturianos nun se mueve, les condiciones llaborales nun ameyoren p’atraer de vuelta a los qu’emigraron en busca de trabayos dignos y les torgues para la formación de nuevos médicos caltiénense. La realidá ye que nun hai presupuestu, nin pa contratar nin para ameyorar les condiciones, porque a cencielles nun se contempló la opción d’ameyorar la salú pública primaria a la de redactar los presupuestos.  Asturies dedica menos del 15 per cientu del so presupuestu en Salú a Atención Primaria, cuando’l porcentaxe encamentáu ye d’un 25 per cientu.

La desidia del SESPA faise evidente  nun datu: el puestu de responsable de la denominada “Estratexa pa un Nuevu Enfoque de l’Atención Primaria n’Asturies” lleva ensin responsable más de cuatro meses. Pa munchos ye difícil nun ver una intencionalidá en tou esti procesu d’esmantelamientu de la Sanidá Pública en beneficiu de la privada.

Xicu Llamazares

This work is licensed under a Creative Commons Attribution 4.0 International License.