Esti llibru nun podría salir nun intre más oportunu ¿Cuánto lleves preparándolu?

– Sí, la verdá ye que ye bien oportunu. Entamé la preparación d’esta Apoloxía de la llingua asturianao defensa del asturianu va poco, cuando vi que les conversaciones de los partíos políticos teníen aspeutos persospechosos. Entós dediquéme a axuntar artículos míos, igual de prensa que de congresos y revistes científiques, onde se pue ver cómo fueren evolucionando los distintos frentes de llucha y de polémica escontra los enemigos del asturianu y de la so normalización y normativización. Yá al principiu de los pasaos años 80 hubo abondes intervenciones míes y d’otra muncha xente, de manera que tengo material abondo guardao. Tuvi que facer una bona esvilla pa quedame colos testos que podíen ser agora más representativos ya interesantes pa los llectores d’anguaño.

¿Diríes qu’hebio una evolución nos argumentos, tantu a favor comu en contra, dende los 80 –cuando entama esti llibru- a agora?

– Igual los argumentos de la xente a favor del asturianu que los de los contrarios a la llingua fueren camudando col tiempu. Asina, en cuantes al tonu de la polémica, los antiasturianos teníen nes sos intervenciones un aquel despectivu, perdonando la vida, anque yá dalgunos dibuxaben un futuru distópicu si lo del asturianu siguía p’alantre. Otramiente, los defensores del asturianu amosábemos un aquel mui emotivu y xeneralmente bien radical, porque nun se facía nada pola normalización del asturianu y nos distintos gobiernos nun se vía progresu dengún.

A midida que, gracies a la movilización, fueren llográndose coses, los contrarios al asturiano fueren perdiendo argumentos y práuticamente quedaren namás coles disculpes del costu económicu y de los peligros políticos. Los argumentos a favor del asturianu fueren faciéndose más diversificaos y centrábense n’aspeutos concretos del procesu de normalización.

Lleendo’l to llibru puede seguise los cambios de posicionamientu de persones y entidaes ¿Los intereses personales y porgueyos políticos marcaron la historia de la llucha llingüística?

– Los intereses fueren mui importantes en tola polémica y, efeutivamente, viose que dellos personaxes camudaren la so posición al ver que’l fenómenu de la enseñanza y de la poca normalización qu’había tenía munchos aspeutos de seriedá. Yera evidente que la población sofitaba cada vez más el procesu de la llingua y, entós, salieren a la palestra nuevos protagonistes y hasta recurrieren a xente de fuera pa sofitar la llucha antiasturianista, echando mano de persones que-yos debíen favores de dalgún tipu. Esta xente que venía de fuera yeren compañeros de fatigues ente los qu’había solidaridaes inconfesables y otros yeren xente que debía dalgunos favores o prebendes al amu y señor, especialmente en mundu académicu.

¿Cualos foron los casos más rescamplantes?

– Los más llamativos resultaren ser dellos miembros de la Academia Española,  como aquel famosu Gregorio Salvador Caja, qu’intervieno con munchu entusiasmu y que llevó rempuestes contundentes. Precisamente’l primer capítulu d’esta Apoloxía reproduz un escritu míu que tenía un títulu mui revelador tituláu “Llega un Salvador”. Esti artículu celebrárenlu munchu llectores favoratibles al asturianu. La propia Academia Española reaicionó de forma impresentable ya innoble rompiendo les rellaciones cola Academia de la Llingua Asturiana y tamién nesti sen  recibió la mio contestación nun artículu qu’espublizó, pa la mio sorpresa, El País.

En cuantes a la posición de xente que vivía n’Asturies, el casu más destacáu fuera’l del catedráticu Emilio Alarcos, que dempués d’afalar a la xente pro llingua asturiana y burllase de dalgunos contrarios, terminó siendo l’ariete más importante desprestixando les postures favoratibles al asturianu. Y paez que nello xugara dalgún aquel la cuestión del porgüeyu.

Releyendo agora lo qu’escribiste va años, ¿retractaríeste de dalguna opinión?

-Non, confirmo tolos mios argumentos, crítiques y ataques, mesmamente a delles postures personales. Pero igual ye verdá que’l tonu de los escritos, si los redactara agora, sedría diferente, porque anque vemos que sigue torgándose’l futuru del asturianu, ye verdá que yá hai dellos avances y que yá tan socialmente desacalificaos gran parte de los argumentos aquellos que, por exemplu, usaben los falsarios “sensatos y pensantes”. Nos años 80 taben intentando afogar toles posibilidaes del asturianu y la nuesa postura nun podía ser otra que la denuncia dura y aceda.

¿Qué artículu te resultó más duru d’escribir?

– A mi nun me resultó duru d’escribir dengún artículu de los que vienen en llibru, nel sentíu de que nun me costó nin m’ablucó redactar aquellos testos polémicos. Pola cueta, tengo que confesar que me prestó pola vida acusar y descalificar a aquellos figurones. O seya, disfruté. Bien ye verdá que too ello llevóme tiempu y qu’había xente que me miraba con compasión y me dicía qu’igual me pasaba daqué por meteme con aquella xente gordo, que taba xugándome’l futuru. Pero aquello yera un combate a muerte y nun pensábamos nello.

Lo que sí ye verdá ye que los artículos resultaren duros abondo con aquella xentuza y que nun aforré calificativu dengún nes mios crítiques, llamando fascistes a aquellos “líderes” como Gustavo Bueno, que volvieren a sacar el xugu y les fleches de la Falange que teníen escondíu nel so cutre arcón de mocedá. Hay un  capítulu d’esta Apoloxía onde recueyu, como una antoloxía del disparate, les burraes y ridiculeces qu’esbabayaren los “sensatos y pensantes”: Bueno suspirando pola llingua del imperiu, otru diciendo que l’asturianu ye un idioma “degenerado”, etc.

 La cabera entrada cinca a comu debe apaecer l’asturianu nel Estatutu y taba tovía escritu cuando se creía na inminente reforma. ¿Ta en camín una rempuesta tuya a la nueva situación de, digamos, derrota?

– Yo respondí nesta Apoloxía de la llingua asturiana fundamentalmente a la inxerencia de l’Academia Gallega na cuestión de la oficialidá. L’Academia Gallega divulgó nos medios del estáu dos exixencies. Per un llau, exixía cuálu había ser el nome de la fala eonaviega. Pero otru llau, exixía que lo que según ella ye gallegu debía ser oficial en toa Asturies. Esta pretensión cabera, irracional y absurda dafechu, encubre la so pretensión de convertir a Asturies nun protectoráu gallegu. Y claro, eso nun pue ser. Los representantes gallegos n’instituciones internacionales siempres punxeren torgues a los derechos llingüísticos de los asturianos y de forma mui agresiva despreciaren siempres que pudieren el procesu asturianu de recuperación llingüística. Agora que n’Asturies hai una mayoría social favoratible a la normalización y a la oficialidá quieren estorbar y dividir metiendo les sos manes nel procesu. Pero Asturies nin ye Galicia nin tien que ver nada con Galicia nin va siguir los encamientos gallegos.

En cuantes al resultáu de les negociaciones ente los partíos políticos, dempués del fracasu lo único que pue plantegase ye deprender de lo que pasó y siguir trabayando.

Fai falta siguir cola reivindicación y faer coses pa enanchar la llingua y la cultura asturiana. Y denunciar que nun val “prometer” l’absoluta “felicidá” un día en que se proclame la oficialidá mientres nun se fai nada. El gobiernu autonómicu tien toles competencies educatives y pue dir afitando la enseñanza n’asturianu, que ta agora parada dafechu. Puen facese munches coses ensin declaración, pue facese más visible l’asturianu en tolos aspeutos, pue haber campañes de concienciación y visualización de la llingua. Pero nun se fai nada, va munchos años que nun hai política llingüística. Esto ye mui malo, porque al plantegase la oficialidá la xente ve qu’hai mui poco fecho y paez que tamos delantre d’un abismu, mientres que si poco a poco fuera faciéndose daqué la oficialidá veríase como una consecuencia lóxica y una continuidá. Y de la que pasa’l tiempu mengüen los falantes de más edá y la xente desanímase. Nun facer política llingüística y confiar en conversaciones que políticos van tener un día futuru alredor d’una mesa lleva al fracasu. Si de verdá quies la oficialidá, vete faciendo coses pa potenciar l’asturianu y nun t’acomodes en qu’un día va dase’l milagru. Esi día del futuru cada partíu siguirá colos sos intereses propios y estratexes y como too lleva muerto munchu tiempu, siéntense poderosos y creadores de realidá. La única solución ye que la realidá del asturianu los emburrie a definise, non a especular colos sos intereses.

¿Daqué na to experiencia te facía esperar un desenllaz como esti? 

Les informaciones que nos apurríen llegaren a facenos creer que podía haber oficialidá, pero yo siempre desconfié, non sólo de les conversaciones de los partíos políticos, sinón tamién del resultáu de les votaciones na Xunta Xeneral y nel Congresu en Madrid. (Por ciertu, tengo mieu de que los políticos parllamentarios asturianos tean despistaos y nun tengan en cuenta esta última cuestión: hai pocu nivel).

Pa que trunfe la oficialidá fai falta demandar que se faiga política llingüística afitando socialmente l’asturianu y siguir calteniendo la reivindicación, porque los grandes partíos van a remolque y siguirán asina.

This work is licensed under a Creative Commons Attribution 4.0 International License.