Denunciáu un home al que pillaron estazando con una motosierra les pieces d’un horru del sieglu XVIII, que primeramente baltara, en Sotu, conceyu Casu. L’home nun foi deteníu pero sí denunciáu y ta siendo investigáu pol xulgáu de Llaviana 

Yá nel mes d’agostu, la construcción del sieglu XVIII viénose embaxo, presuntamente pola mor del severu deterioru que carecía, pero había nicios de que fuera el so propietariu quien lu tirare. Nesi momentu nun se punxo en marcha denguna investigación nin aición llegal, polo que l’acusáu sintióse llibre de rematar la so obra estazando los restos cola motosierra. La pieza pertenecía a un conxuntu d’horros que s’atopen al par unos d’otros en Sotu, formando un conxuntu etnográficu de valor asgaua.

Tantu Andecha Ástur como Amigos del Horru van presentando reiteradamente al “Principado”  propuestes con midíes específiques de proteición pa los horros y paneres, como elementos de suma importancia dientro’l padremuñu ya identidá asturianos, pero ambos colectivos consideren que nun esiste un interés real de caltenelos en bones condiciones. Les propuestes inclúin un rexistru actualizáu d’estes edificaciones y de la so situación para poner en marcha les igües d’urxencia que seyan necesaries,  esenciones fiscales y una llínea d’ayudes dotada d’un presupuestu non risible, asina comu la posibilidá d’ampliar los usos a los exemplares más modernos y la esención efectiva del IBI a los que nun tengan usu como inmueble.

Calcúlase qu’en Asturies hai 25.000 horros y paneres, pero cada añu piérdense cientos ante la desidia dafechu de los encargaos de la proteición del nuesu padremuñu.