Conoz Xixón y Conoz Asturies, dos programes dedicaos a reciella y mocedá, completen la ufierta de l’agrupación montañera pa que los sos socios conozan y esfruten del país
Depués de la ralentización d’actividaes de los caberos años l’escenariu esportivu y montañeru asturianu va alicando y amuesa d’ello ye la bona acoyía que tienen programes comu los del Torrecerredo, nos que lleven a los rapacinos (de 8 a 12 y de 13 a 17) a conocer el Conceyu Xixón o los montes d’Asturies, depende del programa, nun proyeutu qu’inclui esporte, ñatura, arruelu y deprendimientu.
A lo llargo les rutes plantegaes repasarán cuestiones tan estremaes comu hestoria, xeoloxía, cartografía, ornitoloxía o botánica, deprendiendo a defendese nel mediu natural y les téuniques básiques p’andar pel monte. Les actividaes entamen el fin de selmana del 19/20 y allargaránse fasta’l final de cursu.
Pa la xente mayor tamién tienen entamaes delles actividaes, destacando la Semana Santa de Montaña, que tomará comu campamentu base’l so refuxu nel Puertu Braña (San Isidro) pa desplazase dende allí a los montes de la rodiada, o la travesía de Picos que se cellebrará en branu, pero pa la que ya entamen a reservar places.
Alberto Rodríguez
This work is licensed under a Creative Commons Attribution 4.0 International License.
