La Ministra de Transportes, Raquel Sánchez, echa lleña al conflictu colos tresportistes al menacialos con que “les fuercies y cuerpos de seguridá retrucarán con mayor contundencia a los piquetes violentos”
Naide trabaya pa perder perres, hai consensu nesi puntu. Un país nel que ye necesario crear una llexisllación específica sobro eso, tien un problema de base. Los ganaeros tuvieron que pelear duro por esi drechu y entá güei la realidá de la so aplicación ye más que dudosa. Los tresportistes tan nello.
El Gobiernu d’España aconceyó col Comité Nacional del Transporte por Carretera (CNTC) pa tratar de poner fin a la crisis, que vien a ser lo mesmo que quedar consigo mesmu pa dase palmaines en llombu. Los convocantes de la protesta nun tan dispuestos a levantar los paros, al considerar que les sos reclamaciones pa facer rentable la so actividá ante l’encarecimientu de los combustibles nun se ven atendies. Por contra, los camioneros asturianos anuncien mayores movilizaciones. La ministra retruca con menacies d’afalar a los sos perros de les fuercies de seguranza contra los trabayaores, daqué que comu recalca José Fernández, presidente de UITA, organización asturiana de trabayaores del tresporte, ye “echar gasolina al fuéu” , nunca meyor dicho.
A tou esto, el petroleu costaba ayeri 98’02 € el barril, bien perbaxo del másimu hestóricu de 123,16 algamáu el 2008, cuando los precios del combustible nun rozaben siquier los dos euros actuales. Pero nun escaezamos que cuasi la mitá de lo que se paga cuando se llena’l depósitu correspuende a los impuestos estatales. Amás, estos impuestos son desviaos y contabilizaos como una actividá económica fecha en Madrid, en tantu que los tres grandes operaores petroleros tienen la so sede social na ciudá castellana.
Llucía F. Marqués
This work is licensed under a Creative Commons Attribution 4.0 International License.
