De magar el 2008 Asturies pasó de tener 982 sucursales a les 525 actuales, siendo once los conceyos nos que nun esiste dala sucursal bancaria

Nun se pue cobrar la pensión, una beca, el salariu o l’IMV ensin cuenta bancaria. Tampocu ye fácil pagar los recibos de la lluz, l’augua o cualisquier otru conceutu si nun hai un bancu per mediu. La organización económica que’l capitalismu impón fae pasar al traviés d’una entidá bancaria la gran mayoría de les transaciones económiques importantes y col espardimientu l’usu la tarxeta incluso los gastos del díi ente díi tan condicionaos a elles.

Sicasí, n’Asturies presllaron en menos de 15 años más de la metá de les sucursales bancaries, quedando la mayoría de les entá esistentes bultablemente retayaes nos sos servicios. Unicaja (anantes Liberbank, anantes Cajastur) anuncia’l preslle d’otres 24.

Los pueblos, especialmente los de les cuenques y l’Ocidente, son los más perxudicaos, sumando la esclusión financiera a les abondes discriminaciones que carez ya el campu asturianu y les empreses afincaes nel mesmu. Once conceyos asturianos ya nun cuenten con  denguna sucursal bancaria:Caravia, Coaña, Illano, Illas, Peñamellera Alta, Pesoz, Ponga, Proaza, Quirós, Santu Adrianu y Yernes y Tameza.  Les zones rurales nun son rentables y los más de 65.000 millones d’euros del rescate a la banca al paecer nun algamen pa compensar esi escasu beneficiu, polo que suprimen servicios que son básicos pal desendolcu económicu de la fastera y pal díi ente díi de la población, afondando nes dificultaes y afalando l’abandonu ya’l despoblamientu.

L’avieyamientu de la población ye otru factor que fae más grave esta falta d’atención direuta, ya que pa la xente mayor ye abegoso afayase coles aplicaciones on line o desplazase fasta otru conceyu pa realizar les sos xestiones.

Dalgunos conceyos, comu Bimenes o Bual ya anunciaron que tomarán midies y entamarán movilizaciones pa reclamar la creación d’una banca pública que cubra les necesidaes de tol país o al menos la implicación del Gobiernu d’Asturies n’asegurar que los bancos nun abandonen los pueblos.