Los miembros d’esti peculiar clú de sidreros entamen esti mes delles actividaes venceyaes a esta bébora, entamando pola visita guiada al Llagar de Contrueces mañana mesmo

Depués del primer taller d’echar sidre, que se cellebró’l fin de selmana pasáu na Sidrería La Montera Picona con bultable asistencia, esti xueves el Clú de LA SIDRA ufre una visita guiada al Llagar de Contrueces. La selmana viniente tendrá llugar la so tastia mensual en collaboración cola Escuela d’Hostelería, qu’esti mes tará dedicada a la sidre del Llagar Piñera y ya en Semana Santa el Clú sumaráse a la cellebración de la Primer Sidre l’Añu ya’l Sidracrucis.

Na visita de mañana, que tien un coste de diez euros, rebaxáu a cinco pa los miembros del Clú de LA SIDRA, sedrá’l propiu llagareru, Iván Rubiera, l’encargáu de guiar a los participantes per esti centenariu llagar xixonés, ensiñándoyos les sos istalaciones y presentando la sidre que tienen nos toneles.

La cita ye nel mesmu llagar mañana xueves 31 de marzu a les 20:00 h., con horariu finalización a les 21:30, recomendándose apuntase primero nel mail info@lasidra.as. Nel mesmu mail puede facese la iscripción al Clú pa esfrutar de los descuentos y ventaxes del mesmu.

Los prósimos eventos sidreros pueden dir siguiéndose al traviés de la Revista LA SIDRA -disponible na mayoría de sidreries- la so páxina web o les sos redes sociales. Los miembros del Clú reciben amás información detallao de l’axenda sidrera nel whatsapp.