Nun ye una cellebración casual nin inocente, implantar el flamenquismu -asonsañando a los andaluces, ridiculizando al so pueblu al tiempu que se somorguia’l nuesu- lleva siendo una estratexa d’aculturación patente dende los tiempos de Pachu; el PSOE garra con xeitu’l testigu
En Llaviana, de tola vida, n’abril cellebrense espiches, de les de verdá, con toneles de sidre fecho en casa que s’espichaben pa colos vecinos, güevos cocios y conceyales de los bonos, ello ye, los de bacalláu. Sicasí les restriciones alministratives foron amatando -que non finando- esti vezu, bien vivu a entamos del mileniu y qu’agora se cellebra cuasi namás en chigres, perdiendo’n bona midía’l so espíritu. Les restriciones alministratives nun estorben, sicasí, pa servir rebujitos y vestise a pintes: esta vuelta ye’l conceyu de Llaviana, cuna del ilustre presidente, la qu’entama una parodia flamenquista de la Feria d’Abril.
¿A qué vien esi enfotu flamenquista? Dende l’asturianismu denúnciase lo evidente, les feries d’abril son un síntoma más d’un andanciu gafu que percuerre Asturies y que menacia con finar cola identidá propia del pueblu. Un pasu más nel camín d’aculturización ya españolización d’Asturies, la mesma fiebre qu’inclui los brindis con vinu español, llama bodegas a los llagares y pretende sacar les vaques de los pueblos y que tien pente los sos efeutos secundarios l’enclín a dedicar los presupuestos municipales a una cultura ayena.
Nun ye una casualidá que l’Ayuntamientu seya del PSOE, la mayor espresión d’odiu a tolo asturiano, nin que seya patente la influyencia del presidente del “Principado” y es-alcalde de Llaviana. Asina lo destaquen los tuits qu’al respeutu enllenen esta selmana les redes, tachando l’eventu de “Cosmopaletismu casposu” y señalando a Adrián Barbón y al so partíu“Esti ye’l respetu de @AdrianBarbon y la Fsa-Psoe a la identidá d’Asturies. Na to Pola Llaviana, Barbón, onde entá nun se mueve una freba ensin que tu lo sepas.” Destaca un usuariu de la rede social. Otra retruca “El PSOEspañol sigue faciendo-y autopistes identitaries a la estrema derecha pa qu’entre na nuesa tierra”, aludiendo ensin dubia al grupu parllamentariu cedíu polos socialistes a VOX. Nesi mesmu sen s’espresen dende l’Asociación Cultural N’Ast “Esto ye’l PSOE n’Asturies. Españolismu casposu. #Oficialidá non, pero españolaes toles que se quiera. Nun tuenen vergoña @AdrianBarbon el primeru. Normal que -y regalare grupu parllamentariu a VOX”.
Dende Andecha Astur coinciden con esti analís y curiense d’amiestar que nun se trata de denguna fobia escontra los andaluces, destacando qu’esti eventu nun respuende a dengún criteriu social, ello ye, en Llaviana nun hai dengún colleutivu andaluz, nin rellación especial con dengún ayuntamientu nin organización andaluza dala. De fechu, en rialidá’l propiu pueblu andaluz vese perxudicáu por esi seudofolclor que los asonsaña, elleváu a la categoría de sencia ultraespañolista. “Trátase de defender la identidá asturiana escontra los intentos d’asimilación d’Asturies. Nel PSOE tan obsesionaos con faer d’Asturies un barriu de Madrid, y aflamencar les fiestes asturianes”.
Xicu Llamazares
This work is licensed under a Creative Commons Attribution 4.0 International License.
