Los bancos tan obligaos a facilitar cuentes de baldre a les persones vulnerables – con ingresos mensuales de menos de 1.142 € pa una persona- ensin comisiones nin cobru pola tarxeta de débeda
La situación de vulnerabilidá de miles de persones vese agravada al nun disponer d’una cuenta bancaria y quedar espuestes a la esclusión financiera. Ente les consecuencies directes d’esta situación, tán les dificultaes pa contratar servicios básicos (agua, lluz, gas…), cobrar beques, conseguir una vivienda o solicitar prestaciones como l’Ingresu Mínimu Vital.
Lo que cuasi naide sabe ye que les entidaes bancaries tienen la obligación llegal d’ufiertar una cuenta básica, dafechu de baldre, a aquelles persones que s’atopen en situación de vulnerabilidá o tán en riesgu d’esclusión financiera.
Estes cuentes tán esentes de comisiones y nun obliguen a la contratación de dengún productu extra.
Tanto la so apertura como’l so zarru tienen que ser de baldre, neto que’l depósitu y la retirada d’efectivu. Amás, tienen d’ufrir una tarxeta de débeda o prepagu, con una llende de comu másimu 120 movimientos añales.
Les persones solicitantes tendrán unos indicadores d’ingresos inferiores a dos vegaes l’IPREM, ello ye, menos de 1.142 € al mes, 1.430 € al mes pa families de menos de 4 miembros y tres IPREM (1.716€) pa families de 4 o más miembros. Sicasí, la mayoría de les persones nesta situación desconocen esta posibilidá y les entidaes bancaries curiense muncho de nun informar d’esta disposición llegal.
Pa solicitar la cuenta de baldre, dirixise al bancu col certificáu de rentes del caberu exerciciu tributariu, certificáu de prestación o subsidiu de desemplegu cuando proceda, certificáu acreditativu de salariu social, IMV o ayudes d’asistencia social, nos correspondientes casos, o les tres caberes nómines en casu d’asalariaos.
En casu de nun tener estos documentos, podrá solicitase con un informe emitíu polos servicios sociales.
Llucía F. Marqués
This work is licensed under a Creative Commons Attribution 4.0 International License.
