Vienres santu, siete chigres, una fiesta práu, una espicha, gaita, xaréu, tola sidre que pueas beber y un autobús pa dir d’un sitiu a otru ensin complicaciones. Queden pocos díes p’apuntase al Sidracrucis, la pasión más sidrera
La revista LA SIDRA convoca un añu más a participar nel Sidracrucis, la tradicional procesión, que lleva a los sos participantes de chigre en chigre nuna pelegrinación qu’esti añu visitará los conceyos de Xixón y Nava.
L’eventu entamará a les doce’l mediudíe, col culín inaugural y el repartu d’identificaciones, pa salir darréu siguiendo al gaiteru peles cais de la ciudá, y nun finará dica les diez de la nueche, cuando l’ autobús lleven a los esforciaos pelegrinos de vuelta a casa.
Pela mañana sedrán tres los chigres xixoneses que recibirán la visita de la marcha sidrera: La Montera Picona de Ramón, Casa Juan y Terra Sidra, anantes de desembocar nel Pueblu d’Asturies, onde se tará cellebrando la Primer Sidra l’Añu. Allí, amás de tastiar llibremente la Sidra más nuevo de los llagares asturianos, recibirán un “kit sidreru” gastronómicu.
Darréu, l’autobús de la sidra llevará a los penitentes a Nava, onde percorrerán la villa de punta a punta, con paraes nes sidreríes Prida, Plaza, Florida y Estrada. L’itinerariu presllase, comu vien siendo tradición nos caberos años, con una espicha que se celebrará en Casa Pepito.
Nel percorríu sedrá prescriptivo canciar el Xermanín, himnu oficial de la procesión “Xermanín, Xermanín / echa un culete / Xermanín, Xermanín / echa un culín. / ¡Échalu, dende bien altu!! / ¡Échalu, qu’espalme bien!!”
Tou ello –sidra, pinchos, kit sidreru, autobús, espicha, música’l país y tola Sidra que se seya quien a beber- tien un coste de 70 €, que baxa a 60 pa grupos de cinco o más presones y los autocares saldrán dende Xixón y Uviéu.
Les persones interesaes pueden acutar plaza –esti añu más llendaes que nunca comu consecuencia del Covid– pueden facelo nel teléfonu de contautu 652.594.983 -llamada o whatsapp- o nel corréu electrónicu info@lasidra.as
Redaición InfoAsturies
This work is licensed under a Creative Commons Attribution 4.0 International License.
