Klüte, Sólo Astra y Texxcoco son los tres grupos qu’actuarán nel conciertu entamáu pal díi 26 por Sello Bramante  y “Músicas sin Prejuicios”

Sello Brammante, el sellu musical independiente asturianu orientáu principalmente a estilos como’l punk, garax, rock & roll, powerpop y hardcore, xúnese al programa de Radio Músicas sin Prejuicios, enfocáu nel espardimientu de bandes, pa entamar esti interesante conciertu nel que tres grupos con un  estilu que se complementa perfechamente avanzarán dende un estilu rock-pop llixeramente llétricu y con toques sicodélicos del primer grupu, pasando pol rock sicodélicu dafechu del segundu dica la curiosa fusión indie-punk con señaldá noventera qu’atopamos nel caberu.

El conciertu entama cola mocísima revelación canaria de la escena del nuéu garax, Texxcoco,  que tornen col so nuéu trabayu, Psychonaut Mini-LP 10″. Darréu, Sólo Astra –tamién canarios-  entrarán de lleno col so rock sicodélicu, pa finar cola actuación de los gallegos Klüte, a caballu pente l’indie noventeru ya’l punk.

La cita ye en La Salvaje, Uviéu, el 26 de mayu a les nueve la nueche y la entrada tien un coste de diez euros.

Redaición InfoAsturies

This work is licensed under a Creative Commons Attribution 4.0 International License.