L’Asociación ensin ánimu d’arriquecimientu Deporte y Trasplante entama los xuegos en collaboración col Conceyu Xixón cola fin de promover la donación de muérganos y médula y sensibilizar a la población sobro los beneficios del tresplante, asina comu dar puxu a la práutica l’exerciciu físicu, l’esporte de competición y vezos saludables pente les persones tresplantaes, amosando la calidá de vida que lleguen a tener, la superación de retos y metes personales y la so gratitú ante nueves oportunidaes.
Los Xuegos, nos que s’albidra la participación de más de 150 competidores, entamarán cola presentación oficial el 19 d’abril y la inaguración oficial de los mesmos el 29, día en que se cellebrará la xornada “Los tresplantes, meyor con esporte” ya’l partíu de fúbol amistosu pola donación pente los veteranos del Sporting de Xixón y la Selección DYTE, na escuela de Mareo. De magar entós dica’l 2 de mayu sucederánse les competiciones en 13 modalidaes estremaes, como pádel, bádminton y tenis de mesa, natación, golf individual y en pareyes, tenis, petanca, atletismu, dardos, bolos, ciclismu ya un triatlón virtual. Amás, tendrá llugar la mini-maratón 5 km “Carrera pola vida, pola donación y la sanidá pública” integrada na Media Maratón de Xixón.
Los Xuegos Nacionales de Tresplantaos tan empobinaos non solo a toles persones tresplantaes, sinón tamién a les someties a diálisis o en llista d’espera pa ser tresplantaos, buscándose non solo la escelencia nel esporte sinón, especialmente, la convivencia pente ellos y la so visibilización, afalando amás a la sociedá a la donación de sangre, muérganos y médula. Amás dende la organización destaquen que l’actividá física costitui un elementu perimportante, anantes y depués del tresplante y na recuperación dende tres puntos de vista fundamentales: el físicu, l’emocional ya’l social.
Alberto Rodríguez
This work is licensed under a Creative Commons Attribution 4.0 International License.
