L’actu va facese’l les 17.30 hores na sala chill out de Llaboral Centru d’Arte, en Xixón, y va cuntar cola actuación del grupu Baxel

El sábadu 23 d’abril temdrá llugar la gala d’entrega de los ocho premios lliterarios concedíos nel 2021 pol Gobiernu asturianu comu reconocencia a los mesmos autores a los que’l mesmu executivu ñega los drechos llingüísticos. L’actu va facese’l les 17.30 hores na sala chill out de Llaboral Centru d’Arte, en Xixón, y va cuntar cola actuación del grupu Baxel.

El Premiu María Xosefa Canellada de Lliteratura Infantil y Xuvenil recibirálu Xilberto Llano Caelles pola so obra  Boliescritu de primavera, de Xilberto Llano Caelles. Una ciencia ensin enfotu, del filólogu Ramón d’Andrés, ye la obra mereceora de la ventésimo sétima edición del Premiu Máximo Fuertes Acevedo d’Ensayu y a obra La cafiante muerte de Nicolai Bostov, del escritor José Ángel Gayol, ye la ganadora de la 42 edición del Premiu Xosefa Xovellanos de Novela.

El Premiu Xuan María Acebal de Poesía n’asturianu recai nel poemariu Cantar de ti mesma, de Pablo Texón Castañón, mentes que’l Premiu Alfonso Iglesias de Cómic ye pa l’ilustrador y escritor Ángel de la Calle, que presentó’l so trabayu Paez que nun foi ayeri.

La reina de la guapura de Leenane, de Teatru Nun Tris, fíxose con esta edición del Premiu Nel Amaro de Teatru Profesional.

Esti añu estrena amás dos categoríes cola convocatoria, nel 2021, del I Premiu ‘Florina Alías’ a la Meyor Torna al asturianu, que foi pa ‘La Biblia’  editá n’asturianu pola Sociedá Bíblica y del Premiu Enriqueta González Rubín de Narrativa Moza, pa menores de trenta y ún años, que premia la novela ‘No que cinca los seres de lleenda’, de Blanca Fernández Quintana.

Alberto Rodríguez